Një aksident automobilistik ka ndodhur sot në mbrëmje në qytetin e Vlorës, në rrugën e Bishtit të Kalldrëmit, ku ka mbetur i plagosur një fëmijë.
Sipas një njoftimi të Policisë, bëhet me dije se aksidenti ka ndodhur rreth orës 20:05, kurse shoferi është larguar nga vendngjarja.
Nga ana tjetër, 8-vjeçari është dërguar në spital, pasi ka thyer krahun, por fatmirësisht ndodhet jashtë rrezikut për jetën.
Kujtojmë se Vlora është shpallur zonë e gjelbër, por nuk dihet nëse ai ka qenë duke lëvizur me autorizim apo jo, pasi është jashtë orarit të lejuar.
Aktualisht, policia ndodhet në vendngjarje, ku po heton mbi zbardhjen e rrethanave dhe identifikimin e autorit, teksa janë të shumtë dëshmitarët që e panë ngjarjen e që treguan për llojin e makinës.
“Rreth orës 20:05, në rrugën “Sulejman Delvina” pranë një karburanti një drejtues mjeti ende i paidentifikuar ka aksidentuar një fëmijë të mitur të moshës 8 vjeç dhe është larguar nga vendi i aksidentit. 8-vjeçari ndodhet në Spitalin e Vlorës jashtë rrezikut për jetën. Po punohet për identifikimin e autorit dhe për kapjen e tij”, shkruan Policia.
