Gjendja e dy pacientëve të prekur me COVID-19 është përkeqësuar dhe janë dërguar në spitalin “Shefqet Ndroqi” që është kthyer në një spital COVID-2.
Bëhet me dije se dy pacientët kishin shfaqur pneumoni bilaterale dhe se te ‘Shefqet Ndroqi’ do të trajtohen pikërisht për këtë problem shkruan Dosja.al.
Sakaq, në Sanatorium ndodhet gjithashtu edhe një paciente 18-vjeçare e prekur me koronavirus, që disa ditë më parë iu nënshtrua një operacioni kirurgjikal.
Ndërkohë numri i personave të infektuar në vendin tonë ka shkuar në 277 persona, pasi në 24 orët e fundit janë identifikuar 18 raste të reja nga 96 testime të kryera.
Në total deri më tani janë kryer 1919 testime, nga të cilët 277 kanë rezultuar pozitiv, teksa Ministria e Shëndetësisë bën me dije se ka ndërruar jetë edhe një person tjetër mëngjesin e sotëm, duke e çuar numrin e viktimave në 16.
Një 78-vjeçar nga Durrësi humbi jetën sot, teksa mësohet se ishte intubuar prej tre ditësh.
Numri i fëmijëve të prekur ka shkuar në 8 dhe gjendja e tyre është e stabilizuar dhe gjithashtu gjatë 24 orëve të fundit janë shëruar edhe 9 persona të tjerë, duke e çuar numrin në 76.
