Kohëve të fundit është folur shumë në Kishën Katolike për abuzimin seksual që priftërinjtë kanë bërë ndaj personave të ndryshëm, ndaj edhe masat e marra ndaj këtyre personave, por edhe atyre që i fshehin ato, kanë qenë relativisht të rënda.
Rasti më i fundit na vjen nga Franca, ku një gjykatë ka gjetur fajtor një zyrtar të lartë katolik për fshehjen e akuzave të bëra ndaj një prifti për abuzim seksual. Bëhet fjalë për kardinalin Philippe Barbarin, i cili ka marrë dënimin me kusht për gjashtë muaj.
Procesi i kardinalit ka marrë vëmendje shumë të madhe publike dhe kjo pikërisht për shkakun e përmendur më lartë, shpërthimin e skandaleve të pedofilisë brenda kishës katolike.
Gjykata e shpalli fajtor kardinalin për mbulim të akuzave për abuzim ndaj një prifti në varësi të tij, i cili do të përballet me një proces gjyqësor më vonë gjatë këtij viti. Megjithatë avokati i kardinalit është shprehur se vendimin e dhënë nga gjykata do ta apelojë.
