Ndërkohë që gjendja në Partinë Demokratike është e tensionuar, selia ka pësuar ndryshime në fasadën e saj. Ashtu siç ishte berë me dije, godina e selisë së PD-së i është nënshtruar rikonstruksionit duke u veshur me ngjyra dhe e banera.
Në mes flamuri kuq e zi, anash një baner ku shkruhet ‘Zgjedhim të ardhmen’ dhe një tjetër Partia Demokratike e Shqipërisë, ndërkohë që punimet vijojnë ende.
Duket se banerat kanë sjellë dhe më shumë ngjyra në fasadën e selisë. Ndërkohë që një ditë më parë xhamat e tejdukshëm të fasadës së godinës u veshën me letër adeziv, e cila pamundësonte shikimin nga jashtë-brenda, ndërsa letra kishte të stampuar logon e Partisë Demokratike.
Por ndryshimet duken se kanë ndodhur dhe në pjesën e brendshme. Kjo pasi në korridorin e katit të parë u hoqën disa foto nga muret anësore, ku shfaqeshin momente të suksesshme të qeverisjes së Berishës
Nuk dihet se çfarë do të ndodhë sot në selinë e partisë më të madhe opozitare në vend, ndërsa Lulzim Basha ka theksuar se situata do të vijojë në normalitet, pa ngjarje të pazakonta.
Para dy ditësh ka pasur një përplasje virtuale mes Komisionit të Rithemelimit dhe PD të Bashës. Komisioni i Rithemelimit tha se Basha Partinë Demokratike po e kthen në një bunkier ndërkohë që kryedemokrati u shpreh se ish-kryeministri Berisha po nxit dhunë me deklaratat dhe aktet e tij. Lideri historik i Partisë Demokratike, Berisha do të udhëheqë një protestë kombëtare, disa javë pas asaj që thirri kundër vizitës së presidentit serb Aleksandar Vuçiç në Tiranë.
