Kandidati për deputet i PD në qarkun e Fierit, Enkelejd Alibeaj ka sqaruar arsyen pse Partia Demokratike ka kërkuar përsëritje të zgjedhjeve në vetëm 9 qarqe të vendit dhe jo në të gjitha. I ftuar në emisionin “Open”, Alibeaj tha se me 83 mijë fletë votimi të shpallura të pavlefshme, PD ka të paktën 8 mandate qënuk i përgjigjen realitetit. Më tej ai ka shjeguar se përsëritja e zgjedhjeve është kërkuar në 9 qarqe sepse në nenin 160 është e përcaktuar se mund të kërkohet paligjshmëri dhe përsëritje e zgjedhjeve kur masa e pavlefshmërisë e përkthyer në shifra, ndryshon rezultatin e zgjedhjeve. Ndërkohë, në vendet e tjera ku gjithashtu ka pasur shkelje si në Kukës, Lezhë apo Dibër, sipas Alibeajt, rezultati nuk ndryshon për PD-në.
“Me 83 mijë fletë votimi të pavlefshme, kemi së paku 8 mandate deputetësh që nuk i përgjigjen realitetit. Por pse ne po kërkojmë përsëritje zgjedhjesh në këto 9 qarqe? Sepse në nenin 160 përcaktohet se “ke të drejtën të kërkosh paligjshmëri dhe përsëritje të zgjedhjeve kur masa e pavlefshmërisë e përkthyer në shifra, ndryshon rezultatin e zgjedhjeve. Ka pasur shkelje në Kukës, Lezhë apo Dibër, por s’na ndryshon rezultati”, ka thënë Alibeaj.
Kujtojmë që Partia Demokratike kërkoi përsëritje të zgjedhjeve në 9 qarqe të vendit, pasi sipas tyre janë konstatuar shkelje të rënda ligjore që tjetërsojnë rezultatin.
