Ish-ministri i Shëndetësisë, Tritan Shehu thotë se kryeministri Edi Rama, Vuçiç e Zaev kanë pasur ditën e sotme një takim të fshehtë. Shehu shkruan në një status në Facebook se me anë të minishengen-it ballkanik, tre liderët duan të zhdukin nga harta e Ballkanit jo vetëm Kosovën, por edhe 8 shtete të tjera, nga të cilat 5 janë pjesë e BE.
Shehu thotë se ditë të zeza kombëtare dhe historike na presin, nëse projekte të tilla lejohen të avancojnë.
Statusi i plotë:
Sot një takim “okult” Vuçiç-Zaev-Rama, që në vend të Brukselit përcakton per neve si Europë, Beogradin!
Ishte Zaev, që mbas takimit të sotëm on line komunikon për gjetjen e re të asaj treshe:
“Ballkani i Ri Europian”, Serbi, Maqedoni e Veriut, Shqipëri, pra te ashtuquajturin MiniShengeni ballkanik.
Pa dyshim me qendër Beogradin e lider universal Vuçiç.
Duke “zhdukur” keshtu nga harta e Ballkanit jo vetëm Kosovën, por dhe 8 shtete të tjera, nga të cilat 5 janë anëtare të BE.
Në fakt kjo është vetëm “Jugosllavia e Re”, që falë qendrimit konseguent të drejtuesve të Kosovës nuk ka brenda këtij projekti diametralisht të kundërt me realitetin, gjeografinë, historinë, perkatësinë, interesat e aspiratat e mëdha jo vetëm të shqiptarëve edhe Prishtinën.
Dhe ndërkaq në fshehtësi e pa asnjë transparencë po përgatisin takimin vendimarrës të 29 Korrikut!
Nuk përjashtohet që aty të përfshihet ne këtë nocion te ri gjeopolitik anti shqiptar, edhe Rusia.
Në fakt janë të gjitha premisat për këtë, se Serbia e ka firmosur tashti Traktatin EuroAzian me Moskën, si “zinxhir” tërheqje për këtë “Jugosllavi te Re”, pavarësisht se mbi “gjethen e fikut” të saj shkruhet MiniShengeni ballkanik.
Ditë të zeza me pasoja të rënda kombëtare e historike na presin, nqs të tilla projekte ogurzeza do të lejohen të avancojne.
