Ditën e sotme ish-drejtoresha e Autoritetit Rrugor Shqiptar, (ARRSH), Sonila Qato është paraqitur në ambientet e Prokurorisë së Posaçme kundër Krimit dhe Korrupsionit (SPAK), e shoqëruar nga avokati i saj.
Ndërkohë që pasi qëndroi për afro 2 orë në SPAK, ish-drejtoresha e ARRSH, Sonila Qato është ndalur në një prononcim për mediat.
Ajo tha se ishte pyetur si person që ka dijeni për shkeljen e barazisë në tendera, për rrugët Kardhiq-Delvinë, pas kallëzimit nga kompania Gjoka, e cila u përjashtua nga tenderi.
“Çështja nisi 3 vite më parë, me dorëheqjen time nga detyra e ARRSH. U pyeta për procedurën e kallëzimit është për rrugën Kardhiq-Delvinë. U pyeta në dijeni të personit që ka të dhëna për çështjen. Me sa u njoftova ishte kallëz për shkelje të barazisë së çështjes. Përderisa prokuroria është duke kryer veprimet procedurale mendoj se shkaku im i dorëheqjes ishte që të vijonte me procedurat dhe për të vënë drejtësinë në pah” deklaroi ajo.
Sjellim në vëmendje se Qato u dorëhoq nga detyra në shtator të vitit 2019.
Në janar të vitit 2020 Kontrolli i Lartë i Shtetit bëri kallëzim në prokurori për ish-Drejtoreshën e Autoritetit Rrugor Sonila Qato dhe 3 anëtarë të Komisionit të Vlerësimit të Ofertave. Sipas KLSH, ata shkelën procedurat e tenderimit për tunelin e rrugës Kardhiq-Delvinë me vlerë 19 milionë euroi cili u anulua në gusht 2019 pasi kompania Gjoka Konstruksion ishte skualifikuar 2 herë. Rruga Kardhiq Delvinë është një ndër më problematiket pasi ende pa përfunduar punimet, vitin e kaluar pati një shembje skandaloze në pjesën hyrëse të tunelit. Cilësia e rrugës Kardhiq-Delvinë, për të cilën është propaganduar vazhdimisht evidenton cilësinë e punës së “Gjoka Konstruksion”, kompanisë që luftoi “me shpirt” për të marrë tenderin.
Në fakt, kompania “Gjoka Konstruksion” nuk është një emër i padëgjuar, pasi ka pasur vazhdimisht skandale me tenderat e fituara nga ajo.
