Ditën e sotme Gjykata në Serbi ka lënë të lirë përgjegjësin për sulmin në Veri të Kosovës, Milan Radoiçiç. Teksa nuk kishin kaluar as 24 orë nga arrestimi i terroristit Radoiçiç, drejtësia e ka parë të arsyeshmë që të bëjë një sy “qorr”. Prokuroria kërkoi paraburgimin me arsyetimin e rrezikut të arratisjes, por Gjykata e injoroi. Me vendimin e 4 tetorit, atij i është ndaluar largimi prej territorit të Serbisë, pa miratim të gjykatës dhe i është ndaluar të shkojë në territorin e Kosovës.
Ky vendim nxjerr hapur qasjen e padrejtë të drejtësisë serbe teksa favorizohet një person i rrezikshëm, autor i sulmit të organizuar në Kosovë, ku mbeti viktimë efektivi Afrim Binjaku. Gjithashtu lirimi i tij nxjerr zbuluar përfshirjen e shtetit serb në sulmin që pati pasoja tragjike.
Sjellim ndërkohë në vëmendje kriminelët serbë të luftës, të cilët kanë kryer krime makabre dhe asnjë prej tyre nuk është dënuar. Ndërkohë që paradoksale paraqitet qasja nga ana e Kosovës, që i ka dërguar në Gjykatën Speciale heronjtrë e vendit, ata të cilët luftuan kundër serbëve.
Përmendim ish-krerët e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi, Rexhep Selimi, si dhe ish-pjesëtarë tjerë të kësaj ushtrie po mbahen në paraburgim nga Gjykata Speciale prej më shumë se 3 vitesh. Theksojmë se atyre iu është mohuar çdo kërkesë për t’u gjykuar në gjendje të lirë, edhe se rreziku për t’u arratisur është shumë më i vogël sesa ai për Radoiçiç.
Pa harruar sigurisht, ish-luftëtarin e UÇK-së, Dritan Goxhaj, për të cilin Gjykata e Tiranës dha vëndimin që të ekstradohet drejt Holandës.
Për këtë çështje ka pasur një reagim të fortë nga opinioni publik, ku janë zhvilluar disa herë protesta. Një pyetje retorike vjen natyrshëm. Si do të ishte reagimi nga ana e ndërkombëtarëve nëse ndonjë shqiptar i Kosovës do të kryente sulm terrorist në Serbi?
