Koronavirusi ka ndikuar në mënyrë të pakthyershme jetët dhe shëndetin e të gjithëve, por teksa shëndeti fizik ka qenë në qendër të vëmendjes, ai mendor ka kaluar në plan të dytë. Megjithatë Organizata Botërore e Shëndetësisë e ka risjellë në vëmendje këtë problem me anë të një deklarate të bërë herët të enjten.
Shenjat psikike të lëna nga pandemia vijnë si nga infeksionet dhe frika e infeksionit, por edhe nga pasojat psikologjike të bllokimeve dhe vetë-izolimit që shumë kanë zgjedhur në një përpjekje për të ndaluar përhapjen e sëmundjes, tha OBSH.
Për më tepër, shqetësimet për papunësinë, shëndetin financiar dhe izolimin shoqëror të gjitha mund të çojnë në rënie të shëndetit të përgjithshëm mendor, paralajmëroi raporti.
“Njerëzit në rajonin Europian janë thellësisht të ndikuar nga Covid-19 dhe pasojat e tij”, tha drejtori rajonal i OBSH Hans Kluge.
Ai tha që efektet pasuese të sëmundjes do të rëndojnë shumë në shëndetin mendor dhe ndjenjën e mirëqenies së njerëzve.
Por në të njëjtën kohë pandemia u jep vendeve një shans për të menduar për mënyrën se si ato ofrojnë kujdesin e shëndetit mendor dhe për të bërë reformat e nevojshme.
“Është një shans që asnjë vend nuk mund ta lejojë të kalojë, nëse duam të rindërtojmë më mirë dhe më fortë”, tha Kluge.
Ai shtoi se shëndeti mendor dhe mirëqenia duhet të konsiderohen si të drejta themelore të njeriut.
