Covid-19, virusi që ka ‘paralizuar’, frikësuar dhe ka ngritur shumë pikëpyetje në mendjet e njerëzve deri tani ka shënuar 175, 759 viktima, 2, 536,973 të infektuar, teksa 686,321 persona janë shëruar.
Shumë pak dihet për të, që tashmë është përhapur kudo, madje ka ‘gjunjëzuar’ edhe kombet më të fuqishme në botë, ndërsa mjekët ende nuk kanë një ilaç në duart e tyre.
Deri tani bluzat e bardha kanë bërë kombinime medikamentesh, ose kanë përdorur antibiotikë, që kanë mundur ‘armikun’ në murtajat e mëparshme.
Sakaq, lëkundje të fuqishme ka marrë edhe ekonomia e cila pritet të përfshihet nga një krizë e thellë.
Së fundmi, Organizata Botërore e Ushqimit thotë se bota është në rrezik nga uria “me përmasa biblike” si pasojë e koronavirusit, raporton BBC.
David Beasley, kreu i kësaj organizate është shprehur se duhet të ndërmerret një veprim urgjent për të shmangur një katastrofë të mundshme sepse personat që vuajnë nga uria në gjithë botën mund të dyfishohet, nga 135 milionë në 250 milionë.
Vendet më të rrezikuara nga uria janë 10 shtetet e prekura nga konflikti, kriza ekonomike dhe ndryshimi i klimës si: Jemeni, Republika Demokratike e Kongos, Afganistani, Venezuela, Etiopia, Sudani i Jugut, Sudanin, Siria, Nigeria dhe Haiti.
Duke iu drejtuar Këshillit të Sigurimit të Kombeve të Bashkuara gjatë një konference me video, Beasley tha se bota duhej të “vepronte me mençuri dhe të vepronte shpejt”.
“Ne mund të përballemi me kriza të shumta urie me përmasa biblike brenda disa muajve. E vërteta është se ne nuk kemi kohën në anën tonë”, është shprehur David Beasley, kreu i Organizatës Botërore të Ushqimit.
