Kreu i Partisë Demokratike Lulëzim Basha në një postim të tijin në “Facebook” bëri thirrje që të gjithë dekokratët të bashkohen në Kuvendin e 18 Dhjetorit.
Basha e konsideroi bashkimin e demokratëve me 18 Dhjetor, si një mënyrë për të zgjedhur të ardhmen. Sipas Bashës ora më e errët është ajo pak përpara agimit, duke e krahasuar kështu me situatën aktuale të Partisë Demokratike.
“Ora më e errët është ajo pak përpara agimit. Kështu ishte 31 vite më parë, kur Partia Demokratike e Shqipërisë u themelua për të ndarë të ardhmen nga e shkuara, për të sjellë lirinë, për të rrëzuar kultin e individit dhe për ta ribashkuar Shqipërinë me Perëndimin. Kështu është sot. Prandaj ditët më të mira i kemi përpara. Demokratët do të bashkohen më #18Dhjetor për të zgjedhur sërish të ardhmen, e me qytetari do ofrojnë modelin e ndryshimit që shqiptarët kërkojnë, për t’i dhënë fund tranzicionit”, shkruan Basha.
Kujtojmë që ish-kryeministri Berisha, me datë 11 dhjetor zhvilloi Kuvendin Kombëtar të Partisë Demokratike të thirrur nga vetë ai.
Kuvendi Kombëtar të shtunën e 11 dhjetorit me propozim të një grupi anëtarësh dhe me mbështetjen e 15% të delegatëve vendosi miratimin në parim të statutit të ri të Partisë Demokratike.
Një vendim i tillë u konfirmua nga drejtuesi i komisionit të Kuvendit Kombëtar, Belind Këlliçi. Këlliçi bëri me dije emrat e 29 anëtarëve të Komisionit të Rithemelimit të PD-së, të cilët u votuan nga delegatët.
