Ashtu siç ishte paralajmëruar në protestën e mëparshme në ambientet e shkollës, këtë të hënë nxënës të kolegjit turk “Mehmet Akif” janë mbledhur për të protestuar para godinës së Ministrisë së Arsimit. Ato po protestojnë në shenjë revolte ndaj vendimit të pak ditëve më parë nga ana e qeverisë, i cili urdhëronte mbylljen e kolegjit. Siç shihet dhe nga pamjet, të shumtë janë nxënësit, prindërit dhe përfaqësues të shkollës, të cilët aktualisht janë stacionuar para Ministrisë së Arsimit. Ata njëzëri kanë kërkuar që të tërhiqet vendimi i qeverisë dhe që shkolla të vijojë mësimin.
Ndërkohë, një ditë pas vendimit të qeverisë, reagoi dhe ministrja e Arsimit, Evis Kushi e cila pohoi se arsyeja që ishte mbyllur shkolla, ishte për faktin se kolegji ishte transferuar në një godinë për të cilën nuk ishte marrë leje dhe se nuk plotësonte standardet.
Në debate lidhur me këtë vendim u përfshi edhe politika, ku opozita s’i kurseu akuzat për qeverinë, ndërkohë që Berisha iu bëri thirrje qytetarëve që t’i bashkohen protestës që do të mbajë kolegji. Ndërkohë mendohet se për mbylljen e kolegjit është marrë parasysh vendimi i Erdogan për mbylljen e të gjitha sistemeve arsimore që financohen nga shoqata e rivalit të tij Fetoha Gulen.
