Plani i satelitëve nuk është anuluar! Këtë e bën të ditur kryeministri Rama, teksa mosrealizimi i premtimit i bëri të gjithë të mendojnë kështu. Kryeministri Edi Rama në konferencën e sotme për bujqësinë i është rikthyer idesë së tij për të dërguar në orbitë satelitët ‘Albania 1’ dhe ‘Albania 2’, të cilët ishin premtuar për të qenë gati brenda këtij muaji. Sipas Ramës, satelitët në hapësirë do të jenë një opsion i mirë për inspektim të saktë, në mënyrë që të mos politikat e qeverisë të mos bazohen në të dhëna fiktive.
“Na duhet të shtyjmë më shumë tek teknologjia dhe inovacioni. Nëse mbi 15 mijë fermerë duan naftë, po sa traktorë ka ky vend se nuk del llogaria. Ka një shkalë fiktiviteti. Si do të adresohet? Do të adresohet përmes teknologjisë dhe formalizimit. Nga një anë me regjistrin e tokës dhe vënien në përdorim dronët dhe satelitëve. Përmes formalizmit me regjistrin e fermës, regjistrin digjital të fermës dhe vënien në përdorim të dronëve e satelitëve që për shkak të procedurave kanë marrë më shumë kohë sesa e kishim parashikuar, por do të vijnë brenda këtij viti dhe me faturat, naftën do ta marrësh por duhet të sjellësh faturat. Ne nuk kemi dashur ta bëjmë të vështirë dhe të lodhshme prandaj ne jemi duke punuar që inspektimin ky vend ta çojë në qiell. Ta bëjë me satelitë, drona dhe jo me inspektorë”, u shpreh Rama.
