Debate të forta po zhvillohen në mbledhjen e kryesisë së Partisë Demokratike. Situata në Selinë Blu nuk paraqitet aspak e qetë që kur Lulzim Basha vendosi të përjashtojë Sali Berishën nga grupi parlamentar i Partisë Demokratike. Kujtojmë këtu ku disa deputetë ishin kundër vendimit për përjashtimin e ish-kryeministrit demokrat Sali Berisha dhe i janë shprehur qartazi duke iu kundërvën Bashës.
Detaje të reja kanë dalë në dritë sa i takon takimit që zhvilloi ditën e sotme Lulzim Basha në Selinë Blu me grupin parlamentar të PD-së.
Sipas informacioneve të marra mësohet se Flamur Noka, një nga më të afërmit e Berishës ka debatuar me grupin , duke kërkuar që të gjendet një zgjidhje për situatën e krijuar në parti. Ndërkohë Noka nuk është në të njëjtin mendim me Bashën duke u shprehur haptazi kundër përjashtimit të Berishës.
Në ballafaqimin mes këtyre dy figurave të PD-së, mësohet se Noka e ka bërë përgjegjës Bashën në atë që ai e quan “ngulje thike pas shpine ndaj Sali Berishës”.
Noka: T’i je përgjegjës që i ke ngulur një thikë pas shpine Sali Berishës. Ti pavarësisht kësaj, ke thënë se është vendimi më i vështirë i jetës time.
Nga ana tjetër mësohet se Lulzim Basha është nisur pas takimit për të takuar kryetarët e degëve në qarkun e Fierit, vetëm një ditë para së Berisha të mbajë takimin e dytë në këtë qytet.
Gjithashtu mësohet se gjatë ditës së sotme kryedemokrati Basha po zhvillon takime me kreret e degëve lokale të PD në qarkun e Fierit.
Këto takime të Bashës me krerët e degëve të Fierit vijnë një ditë para takimit që ka paralajmëruar Berisha në këto qytete në kuadër të iniciativës për referendum që ka ndërmmarrë.
