Presidenti i Republikës, Ilir Meta, ka reaguar për nismën e shkarkimit të iniciuar nga Partia Socialiste, duke e cilësuar si “shashkë”. Meta ka shkruar se vëmendja momentalisht duhet të përqëndrohen tek përmbyllja e procesit zgjedhor pasi asgjë s’ka përfunduar.
Kujtojmë se ditën e sotme Partia Socialiste me 50 firma konkretizoi nismën për shkarkimin e Presidentit për shkelje kushtetuese para dhe gjatë fushatës zgjedhore. Ndërkohë Meta kërkon që të hetohen krimet zgjedhore.
“Të përqendrohemi në mbylljen e procesit zgjedhor. Asgjë nuk ka përfunduar!
Të vazhdojë administrimi i çdo kontestimi dhe ankese deri në rinumërimin e votës së fundit.
Detyrë e të gjithë subjekteve të ndjekin procesin deri në fund.
Mos u merrni me “shashka”, por me hetimin e krimeve zgjedhore!”, ka shkruar Presidenti Ilir Meta.
Kujtojmë se ditën e sotme disa nga socialistët që kanë firmosur kërkesën janë Taulant Balla, Elisa Spiropali, Spartak Braho, Pandeli Majko, Olta Xhaçka, Eglantina Gjermeni, Ergys Çyrbja, etj.
Ndërkohë, në kërkesë paraqiten si prova të shkeljes së Kushtetutës nga Presidenti disa deklarata të këtij të fundit.
Në kërkesën që 50 deputetë të Partisë Socialiste i kanë dërguar Kuvendit të Shqipërisë për shkarkimin e Presidentit Ilir Meta, janë edhe deklaratat e Kreut të Shtetit ndaj ambasadores së SHBA në Tiranë, Yuri Kim, në prag të zgjedhjeve të 25 prillit.
Kjo e fundit i kërkoi Presidentit të mos përmendë më “sfurqet”, ndërsa Meta iu përgjigj live në një studio televizive, duke i kërkuar që të mos merrte në mbrojtje kryeministrin Edi Rama.
Ashtu si edhe deklarata të tjera të bëra gjatë fushatës elektorale, për 50 deputetët firmëtarë të nismës për shkarkimin e Metës, edhe kjo deklaratë kundër ambasadores Yuri Kim është në shkelje të Kushtetutës së Republikës.
