Ditën e sotme është parashikuar që të nis prishja e Tregut Elektrik, pranë Shkollës së Baletit.
Ndërkohë tregtarët kanë filluar protestën pasi janë kundër këtij vendimi të Bashkisë së Tiranës.
Rreth orës 10:00, punonjësit e bashkisë kanë nisur çmontimin e kontentierëve.
Bashkia u ka kërkuar tregtarëve që të zhvendosen te UPNA, ish –Uzina e Autotraktorëve në Shkozë, por ata kërkojnë nga bashkia që fillimisht të sistemojë zonën.
Në zonën e tregut, janë mbledhur më shumë se 100 tregtarë, të cilët kërkojnë zgjidhje për ta dhe mallrat e tyre.
Ndërkohë pjesa e tregut është e rrethuar me forca të shumta policie.
Burime për mediat bëjnë me dije se tregtarët kanë dorëzuar një peticion kundër prishjes së Tregut Elektrik nga Bashkia, por mesa duket kërkesa e tyre nuk është marrë parasysh.
Të revoltuar dhe të pashpresë, tregtarët shprehen se nëqoftëse tregu prishet, ata nuk kanë se ku të çojnë mallin.
“Do e hedhim mallin në Lanë”, është shprehur një prej tregtarëve.
Më pas tregtarët e zhvendosën protestën para bashkisë së Tiranës.
