Sot në Bruksel zhvillohet konferenca e pestë ndërqeveritare mes Shqipërisë dhe Bashkimit Europian, ku pritet të formalizohet hapja e negociatave për grupkapitullin e tretë me titull “Konkurrueshmëria dhe Rritja Gjithëpërfshirëse”. Delegacioni shqiptar do të kryesohet nga ministri për Evropën dhe Punët e Jashtme, Igli Hasani.
Ky grupkapitull përfshin tetë fusha kryesore që lidhen me zhvillimin e qëndrueshëm dhe mirëqenien ekonomike, përfshirë:
• Kapitullin 10 (Transformimi Digjital dhe Media),
• Kapitullin 16 (Tatimet),
• Kapitullin 17 (Politika Ekonomike dhe Monetare),
• Kapitullin 19 (Politika Sociale dhe Punësimi),
• Kapitullin 20 (Ndërmarrjet dhe Politika Industriale),
• Kapitullin 25 (Shkenca dhe Kërkimi),
• Kapitullin 26 (Arsimi dhe Kultura),
• Kapitullin 29 (Bashkimi Doganor).
Hapja e këtij grupimi shënon një tjetër hap përpara në rrugën e integrimit, duke e çuar në 27 numrin e kapitujve dhe kritereve që janë hapur deri më tani në kuadër të negociatave.
Këto zhvillime kanë ndodhur në një hark kohor prej vetëm tetë muajsh, pas hapjes së Grupimit 1 “Themeloret” më 15 tetor 2024, Grupimit 6 “Marrëdhëniet me Jashtë” më 17 dhjetor 2024 dhe Grupimit 2 “Tregu i Brendshëm” më 14 prill 2025.
