Ish-prokurori Adriatik Cama i cili mori një plumb nga vrasja që ndodhi në Tiranë, ndodhet në spital dhe bëhet me dije se është jashtë rrezikut për jetën.
Dyshohet se ish-vjehrri ka qëlluar me armë zjarri drejt dhëndrit të tij që ndodhej në proces divorci me vajzën e tij. Nuk dihet nëse ish-prokurori që shërbente dhe si avokat ka qenë përfaqësues i viktimës në procesin gjyqësor.
Autori është larguar me një mjet tip Hyundai nga vendngjarja dhe Policia i është vënë në ndjekje. Identiteti i personit të vrarë dhe i autorit nuk bëhet ende me dije.
Një i mitur është shoqëruar nga Policia e Shtetit, disa minuta pas vrasjes së ndodhur brenda një lokali pranë Gjykatës së Tiranës. I mituri mund të jetë i afërm i viktimës pasi ka kaluar rrethin e Policisë dhe ka hyrë brenda në lokal.
Më pas, ai është nxjerrë jashtë duke qarë duke u mbajtur prej krahësh nga dy efektivë policie.
NJOFTIMI I PLOTË:
Tiranë/Informacion paraprak
Rreth orës 11:50, në bulevardin “Gjergj Fishta” dyshohet se shtetasi M. P. ka vrarë me armë zjarri shtetasin K. S. ( ish-bashkëshortin e vajzës) dhe si pasojë e të shtënave është plagosur dhe shtetasi A. C., i cili ndodhet jashtë rrezikut për jetën.
Shërbimet e Policisë vijojnë krehjen e zonës për kapjen e autorit të dyshuar, shtetasi M. P. Janë ngritur pika kontrolli në hyrje dhe dalje të qytetit të Tiranës. Grupi hetimor, në bashkëpunim me Prokurorinë, po punon për sqarimin e rrethanave të ngjarjes.
