Deputeti i Partisë Demokratike Luçiano Boçi ka deklaruar se sistemi arsimor duhet riformatuar. Me anë të një postimi në Facebook, Boçi shkruan se rastet e dhunës dhe abuzimeve seksuale në shkolla janë të shumta dhe se shkollat në Shqipëri janë shkëputur nga funksioni i saj edukativ. Ai shkruan se duhet ripozicionim të figurës së mësuesit, ndërkohë që shtoi se duhet të vendosen kontrolle të cilësisë së mësimdhënies.
Postimi i Plotë:
TË SHPËTOJMË ARSIMIN/ Rastet e dhunës e ngacmimeve seksuale, ku përfshihen drejtues institucionesh arsimore e punonjës, nuk janë rastësi. Ato janë dëshmi e devijimit dhe rrënimit të një sistemi të tërë tashmë të kalbur. Ky sistem duhet riformatuar. Edukimi brenda tij ka humbur çdo vlerë e qëllimësi dhe shkolla është tërisht e shkëputur nga funksioni social edukativ dhe me një funksion mësimdhënës mjeran. Duhet një legjislacion i ri që përcakton saktë statusin e shkollës, rolin e funksionin e saj në komunitet, përgjegjësitë e detyrat.
Duhet një ripozicionim i ri i figurës së mësuesit, detyrës e vlerësimit të tij si mësimdhënës dhe edukator. Duhet një sistem i ri karriere e vlerësimi për çdo drejtues dhe mësues. Duhet një sistem i ri inspektimi dhe kontrolli të cilësisë së mësimdhënies dhe edukimit. Duhet një rol i ri efikas dhe vendimarrës i prindërve dhe komunitetit. Mbushja e shkollës me patronazhistë e komandime politike, lënia e saj në dorë të pasionantëve politikë pa vlera njerëzore dhe pedagogjike, duhet të marrë fund. Arsimi duhet shpëtuar!!!!
