Ndonëse gazetarët janë ‘kthyer’ në shpresën e shumë njerëzve të mbyllur në shtëpi gjatë pandemisë, si dritarja informuese se çfarë ndodh jashtë mureve të shtëpisë së tyre, duket se vetë media nuk i ka shpëtuar krizës së koronavirusit.
Vlen të përmendet se shtypi i shkruar ndërpreu aktivitetin e tij për disa javë, duke pësuar një goditje edhe më të rëndë, teksa shumë televizione kanë ndërprerë programacionin, për shkak të kushteve të krijuara.
Ndryshimet e bëra në median e shkruar, televizive, por edhe atë online, për shkak të masave kufizuese të marra nga qeveria, duket se po shkaktojnë një impakt negative mbi biznesin mediatik, teksa qeveria shqiptare nuk ka parashikuar ende asnjë paketë ndihmuese.
Gjasat janë shumë të pakta që kjo të ndodhë në të ardhmen, pasi kreu i qeverisë deri tani është shprehur skeptik ndaj një pakete të tillë.
Më herët ditën e sotme, përfaqësuesi i OSBE-së për Lirinë e Medias, Harlem Desir me rastin e Ditës Botërore të Lirisë së Shtypit, u shpreh se media e lirë është i vetmi burim i besueshëm ku merret informacioni dhe po ashtu, media luan rol kyç në luftën kundër përhapjes së informacioneve të rreme, që janë po aq të dëmshme sa dhe vetë virusi.
Ai u bëri thirrje shteteve pjesëmarrëse të OSBE-së t’i lënë gazetarët të punojnë pa frikë apo favorizime dhe të mbështesin mediat që janë në vështirësi financiare për shkak të pandemisë.
LEXO: OSBE bën thirrje: “Mbështesni mediat në vështirësitë financiare prej pandemisë”
Së fundmi, në Ditën Ndërkombëtare të Lirisë së Shtypit, të tjera thirrje kanë ardhur në drejtim të qeverisë, teksa kjo e fundit nuk ka reaguar.
Ambasadori i BE-së Luigi Soreca ka shprehur mbështetjen për rolin e rëndësishëm të mediave të pavarura dhe të besueshme në Shqipëri dhe mbarë botën, duke deklaruar se i mbështesin gazetarët dhe punonjësit e mediave që, me gjithë rreziqet shtesë që vijnë nga COVID-19, po vazhdojnë punën
“Në #DitënBotëroretëLirisësëShtypit, ne riafirmojmë fuqimisht mbështetjen tonë të vazhdueshme për rolin e rëndësishëm të mediave të pavarura dhe të besueshme në #Shqipëri dhe mbarë botën. Liria e shtypit është një e drejtë e cila i përket secilit prej nesh. Ne i mbështesim gazetarët dhe punonjësit e mediave që, me gjithë rreziqet shtesë që vijnë nga #COVID19, po vazhdojnë punën e tyre të rëndësishme në rrethana të vështira, duke i dhënë një zë më të cenuarve dhe mbajnë pushtetin përgjegjës”, shkruan Ambasadori i BE-së Luigi Soreca.
Kryedemokrati Lulzim Basha në një status në Facebook, shkruan se Shqipëria ka bërë hapa pas për lirinë e medias, duke vlerësuar rrezikun që iu kanos gjatë pandemisë.
“Ligjet kundër medias online, kufizimi i qasjes së gazetarëve në informacion, arrestimi i gazetarëve dhe aktivistëve dhe mbyllja e mediave kritike ndaj qeverisë, janë vetëm disa nga problemet që kanë përkeqësuar e lirinë e medias në Shqipëri, ku propaganda e qeverisë kërcënon çdo ditë lirinë e shprehjes dhe të vërtetën.”
Po ashtu, edhe Ambasada e SHBA në Tiranë ka kujtuar sot Ditën Botërore të Lirisë së Shtypit duke e vënë theksin në lirinë dhe paanshmërinë e mediave.
“Dita Botërore e Lirisë së Shtypit 2020 përkrah veprime që nxisin gazetarinë e pavarur. Përse? Një shtyp i lirë dhe i paanshëm ngre pyetje dhe kërkon përgjigje në emër të shoqërisë. Media informon publikun dhe ndihmon në përhapjen e ideve, gjë e cila përmirëson qëndrueshmërinë sociale, politike dhe ekonomike.”
Ndonëse kryeministri Rama shquhet për “marrëdhënien” e tij të mirë me rrjetet sociale, ai nuk ka postuar ende asgjë.
Ta ketë harruar vallë këtë ditë?
