Rritja e madhe e numrit të infektuarve dhe viktimave nga COVID-19 e ka bërë Malin e Zi që t’i rikthehet sërish “shtetrrethimit”.
Sipas mediave vendase, nga mesnata masa më të rrepta epidemiologjike do të zbatohen dhe do të futen në “shtetrrethim” disa qytete dhe kufizimet në funksionimin e objekteve të hotelerisë.
Shtetrrethimi do të nisë nga ora 22.00-05.00 të mëngjesit, si dhe ndalimi i funksionimit të objekteve të hotelerisë, do të zbatohen nga e hëna në Nikshiq, Berane, Andrijevicë dhe Rozhaje, qytete me numrin më të lartë të pacientëve, ndërsa Podgorica dhe Kotori punën e kafeneve do ta kufizojnë deri në ora 22.00.
Gjithashtu, nga nesër në të gjithë Malin e Zi, maska mbrojtëse është e detyrueshme për të gjithë qytetarë mbi moshën pesë vjeç.
Autoritetet shëndetësore njoftuan 116 infeksione të reja sot, ndërsa numri mesatar i infeksioneve të reja ishte rreth 250 në ditë në gjashtë ditët e mëparshme, për shkak të tubimeve politike, para dhe pas zgjedhjeve parlamentare.
Aktualisht ka 3.699 raste aktive të infeksionit në Malin e Zi, ndërsa vetëm në shtatë ditët e fundit 20 njerëz kanë vdekur nga koronavirusi. Numri i përgjithshëm i vdekjeve që nga fillimi i pandemisë në vend ka shkaur në 158.
