Biznesmeni Ardian Nikulaj ka humbur jetën si pasojë e nj atentat të mirëmenduar mesditën e kësaj të mërkure. Dy persona ende të paidentifikuar e kanë qëlluar biznesmenin duke e lënë të vdekur në vend teksa ndodhej në lokalin që është në pronësi të tij, në pedonalen e Shëngjinit.
Mësohet se Nikulaj është babai i katër fëmijëve. Po ashtu mësohet se viktima, rreth 50 vjeç kishte ndërruar emrin në vitin 2003, pasi më parë e kishte Marku, ndërsa në vitin 2021 ishte kandidat për deputet me PSD-në e Tom Doshit. Biznesmeni i njohur në të shkuarën ka qenë edhe ish-kreu i ALUIZN-it e në të shkuarën ka qenë i dënuar për disa vepra penale. Në vitin 2003, Nikulaj rezulton i dënuar me 4 muaj burg për armëmbajtje pa leje. Ndërsa në 2006-ën është dënuar me gjobë për kontrabandë dhe falsifikim, te cilat i ka deklaruar edhe në formularin e dekriminalizimit.
Duke iu referuar dhe fakteve, dyshohet se atentati ishte i mirëmenduar dhe autorët fill pas krimit u larguan nga vendngjarja. Nikulaj ishte një biznesmen i fuqishëm në zonën e Shëngjinit.
Burime bëjnë me dije se në vendin e ngjarjes kanë shkuar drejtuesit më të lartë të policisë së shtetit, si dhe kryebashkiaku aktual i Lezhës Pjerin Ndreu.
