Ditën e nesërme, në orën 09:30, do të mbahet seanca gjyqësore për vlefshmërinë dhe caktimin e masës së sigurimit për të miturin M.P., i akuzuar për vrasjen me thikë të 14-vjeçarit Martin Cani.
Ngjarja tragjike ndodhi disa ditë më parë pranë shkollës ‘Fan Noli’ në Tiranë, pas një konflikti mes autorit dhe viktimës.
Sot, në kryeqytet u organizua një protestë nga prindërit e nxënësve, të cilët ishin të shoqëruar edhe nga fëmijët e tyre.
Një nga simbolet që la kjo protestë ishin shenjat dhe gjurmët e duarve të lyera me bojë të kuqe, simbol i gjakut, të vendosura në muret e Ministrisë së Arsimit.
Mesazhi kryesor i prindërve dhe pjesëmarrësve ishte dorëheqja e ministres së Arsimit, Ogerta Manastirliu, të cilën e fajësojnë për këtë ngjarje dhe për situatën në sistemin arsimor.
Ata i kanë dhënë afat ministres deri në fundjavë për të dhënë dorëheqjen, duke paralajmëruar një tjetër protestë në javën e ardhshme në rast se kjo kërkesë nuk plotësohet.
