Ditën e sotme është zhvilluar përgjatë dy orëve manifestimi i thirrur nga presidenti Ilir Meta, në bulevardin “Nënë Tereza”.
Presidenti tha se nëse nuk merret seriozisht dekreti i firmosur sot për kthimin e ligjit për gjyqtarët dhe prokurorët dhe betimin e tyre, atëherë do të hyjë në sallën e Kuvendit, ku do të firmosë dekretin për shpërndarjen e parlamentit.
Në podium, përveç flamurit shqiptar, ishte edhe ai amerikan.
Mirëpo, kjo gjë nuk i ka pëlqyer ambasadores së SHBA, Yuri Kim, e cila reagoi menjëherë me anë të një statusi në Twitter.
Kim ka sqaruar se ambasada nuk ka asnjë lidhje me manifestimin dhe se ishte surprizuar që kishte parë flamurin amerikan.
“U befasova kur pashë flamurin amerikan në “manifestimin” e sonte. Për të shmangur çdo konfuzion, dëshirojmë të sqarojmë se ndërsa SHBA mbështesin të drejtën e protestës paqësore, ne nuk kemi asnjë lidhje me “manifestimin” të sonte,”-shkruan Kim.
Së fundmi, presidenti Ilir Meta është pyetur rreth kësaj deklarate të bërë nga ambasadorja teksa ka qenë i ftuar në emisionin “Çim Peka Live”.
Kreu i vendit tha se nuk ka parë asnjë lajm pasi e gjithë vëmendja e tij ka qenë tek manifestimi.
“Kam zero koment për këtë çështje”, u shpreh Meta, duke mos dashur të komentojë mesazhin e Yuri Kim.
Pas statusit të diplomates amerikane nuk ka vonuar as përgjigja e qeverisë dhe reagimi i parë erdhi nga zv.kryeministri Erjon Braçe.
Braçe ka shpërndarë në rrjetet e tij sociale, statusin e ambasadores amerikane Yuri Kim, e cila u shpreh se SHBA-të nuk kishin asnjë lidhje me tubimin e sotëm.
“Shpulla e parë amerikane,”-shkruan në reagimin e tij zv.kryeministri Braçe.
Manifestimi i thirrur nga Meta, vjen reagimi i parë nga qeveria: “Shpulla e parë amerikane”
Më pas reagoi edhe kryeministri i vendit Edi Rama, i cili në një deklaratë për shtyp tha se Meta nuk mund ta shpërndajë Parlamentin.
