Në Durrës është arrestuar një 36-vjeçar i shpallur në kërkim ndërkombëtar nga autoritetet italiane për trafik të lëndëve narkotike.
I ndaluari është identifikuar si Fatjon Berisha, i njohur edhe me emrin Bledar Berisha. Ai u kap me qëllim ekstradimin drejt Italisë, ku Gjykata e Romës ka lëshuar ndaj tij një urdhër arresti dhe ka caktuar masën e sigurisë “arrest në burg”.
Berisha akuzohet për “trafikim të lëndëve narkotike, kryer në kuadër të një organizate kriminale”, një vepër penale që sipas Kodit Penal italian mund të dënohet deri në 20 vjet heqje lirie.
Njoftimi i Policisë:
Në vijim të operacioneve të njëpasnjëshme për lokalizimin dhe arrestimin e personave të shpallur në kërkim ndërkombëtar dhe kombëtar, Drejtoria e Forcës së Posaçme Operacionale në Departamentin e Policisë Kriminale, në bashkëpunim me shërbimet operacionale të DVP Durrës, finalizoi me sukses operacionin policor të koduar “Operacionalja 52”.
Si rezultat, në qytetin e Durrësit u lokalizua, u kap dhe u vu në pranga, me qëllim ekstradimi drejt Italisë, shtetasi F. B., alias B. B., 36 vjeç, banues në Durrës.
Ky shtetas ishte shpallur në kërkim ndërkombëtar, pasi Gjykata e Romës, Itali, ka caktuar ndaj tij masën e sigurisë “Arrest në burg”, për veprën penale “Trafikimi i lëndëve narkotike, kryer në kuadër të organizatës kriminale”.
Sipas legjislacionit penal italian, kjo vepër parashikon dënim maksimal deri në 20 vjet burgim.
Vijon bashkëpunimi ndërinstitucional për përfundimin e procedurave të ekstradimit të 36-vjeçarit drejt autoriteteve italiane”.
