Detaje të reja janë zbardhur për ekzekutimin e Hekuran Billës, i cili u ekzekutua disa javë më parë në kryeqytet. Gazetarja Klodiana Lala ka dhënë detaje të reja lidhur me jetën e 40-vjeçarit. E ftuar në studion e “News24”, Lala ka treguar se Billa ishte kthyer në Shqipëri që të hiqte dorë nga bizneset e tij, për të vazhduar jetën në Belgjikë, ku e priste një femër. Sipas gazetares, Billa e kishte kuptuar që agresorët po i “vinin rrotull” ndaj kishte vendosur të dilte jashtë vendit.
“Në Belgjikë, Hekuran Billa kishte një partnere marokene. Priste të fejohej me të dhe të krijonte një familje. Ai kishte hyrë nga Kosova në Shqipëri. Kishte ardhur që të jepte firmat për bizneset e tij dhe të vazhdonte jetën e tij në Belgjikë. Mund ta kenë kuptuar se po i “vërtiteshin”. Sa i përket dëshmisë së Adjola Lakrës, ka përgjime ambientale që hedhin poshtë alibinë e asaj,”-tha gazetarja Lala.
Hekuran Billa u ekzekutua më 11 qershor pranë “Qendrës Kristal” në Tiranë, ku kishte shkruar për të takuar motrën e tij që punonte në këtë qendër tregtare. Në orën 21:48 të së enjtes, biznesmenit iu pre rruga teksa udhëtonte me mjetin e tij, të llojit ‘BMW X6”, nga ekzekutori, i cili dyshohet se është vëllai i Prel Markut, Viktori. Ky i fundit qëlloi me armë zjarri në drejtim të tij, dhe iu deshën vetëm 3 sekonda për të vrarë biznesmenin. Hekuran Billa ishte i përfshirë në trafikun e drogës në Angli dhe në rrjetin e prostitucionit. Në vitin 2006 ai ka ekzekutuar me armë zjarri 22-vjeçarin Prel Marku, ngjarje për të cilën ishte dënuar me burg të përjetshëm, por u lirua nga gjykatat shqiptare.
