Që pas miratimit në vitin 2010, ligji për mbrojtjen nga diskriminimi pritet të ndryshojë për herë të parë pas 10 vitesh.
Qeveria ka depozituar në Kuvend draftin, i cili parashikon përfshirjen në listë si shkaqe të diskriminimit edhe pamjen e jashtme, shtetësinë dhe të jetuarit me HIV/AIDS.
Kështu, do konsiderohet diskriminim dhe do ndërshkohet me ligj çdo dallim, përjashtim, kufizim, preferencë apo trajtim i pafavorshëm për shkak të paraqitjes së jashtme.
Gjobat për personat që diskriminojnë për arsyet e mësipërme variojnë nga 10 000 deri në 60 000 lekë dhe nga 60 000 deri në 600 000 lekë në rastet kur diskriminimi bëhet nga persona juridikë.
Ndërsa, kuur personi që diskriminon ushtron një funksion publik, dënimi me gjobë nis nga 30 000 deri në 80 000 lekë, ndërsa për të gjitha kategoritë gjobat duhet të paguhen nga kundërvajtësi jo me vonë se 30 ditë nga komunikimi i tyre.
Nëse personi në fjalë nuk paguan gjobën, atëherë vendimi i dhënë shndërrohet në titull ekzekutiv dhe ekzekutohet në mënyrë të detyrueshme nga zyra e përmbarimit, me kërkesë të Komisionerit, ndërsa gjoba arkëtohet në buxhetin e shtetit.
Format e tjera të diskriminimit të parashikuara në ligjin në fuqi lidhen me gjininë, racën, ngjyrën, etninë, gjuhën, identitetin gjinor, orientimin seksual, bindjet politike, fetare ose filozofike, gjendjen ekonomike, arsimore ose shoqërore, përgjegjësinë prindërore, moshën, gjendjen familjare ose martesore, gjendjen civile, vendbanimin, gjendjen shëndetësore etj.
Ndër të tjera, në projektligji parashikohet edhe një nen, i cili detyron mediat kombëtare që të publikojnë vendimet e Komisionerit që kanë konstatuar diskriminim nëpërmjet gjuhës së urrejtjes dhe kjo lidhet edhe me efektshmërinë e vendimeve të Komisionerit, në lidhje me përdorimin e gjuhës së urrejtjes nga personat publikë.
