Polica e Shtetit ka arritur të vërë në pranga 2 shtetas të cilët po përpiqeshin të kalonin 7 emigrantë të paligjshëm. Shtetasi N. M., 36 vjeç, banues në Pogradec u kap duke transportuar me një automjet, 3 emigrantë të paligjshëm dhe shtetasi L. L., 34 vjeç, banues në Korçë me
DVP Elbasan u kap duke transportuar me një automjet, 4 emigrantë të paligjshëm. Këta shtetas iu kishin premtuar emigrantëve kalimin për në vendet e BE-së. Ata akuzohen për veprën penale “Ndihma për kalim të paligjshëm të kufijve”. Emigrantët do të paguanin nga 50-150 euro për person. Në cilësinë e provës materiale janë sekuestruar 2 automjetet, 4 aparate celulare dhe një sasi parash e dyshuar e përfituar nga kjo veprimtari e paligjshme. Ndërkohë materialet i kanë kaluar Prokurorisë pranë Gjykatës së Shkallës së Parë Elbasan, për veprime të mëtejshme.
Njoftimi i Policisë
Finalizohet operacioni i koduar “Danubi 7”, i zhvilluar nga Seksioni për Hetimin e Trafiqeve të Paligjshme, në bashkëpunim me Sektorin e Policisë Rrugore, në DVP Elbasan.
Goditen 2 raste të veprimtarisë kriminale në fushën e dhënies ndihmë për kalim të paligjshëm të kufirit.
Vihen në pranga 2 shtetas që u kapën duke transportuar 7 emigrantë të paligjshëm, me 2 automjete.
Në zbatim të planit të masave për të parandaluar dhe goditur aktivitetin e paligjshëm të dhënies ndihmë shtetasve të huaj për kalim të paligjshëm të kufijve dhe tranzitimin e tyre përmes territorit shqiptar, me destinacion vendet e BE-së, specialistët për Hetimin e Trafiqeve të Paligjshme, në bashkëpunim me shërbimet e Qarkullimit Rrugor, në DVP Elbasan, bazuar në informacionet e siguruara në rrugë operative, organizuan dhe finalizuan me sukses operacionin e koduar “Danubi 7”, në kuadër të të cilit u bë arrestimi i shtetasve:
- N. M., 36 vjeç, banues në Pogradec, për veprën penale “Ndihma për kalim të paligjshëm të kufijve”, pasi u kap nga shërbimet e Policisë, në fshatin Xibrakë, Librazhd, duke transportuar me një automjet, 3 emigrantë të paligjshëm, të cilëve iu kishte premtuar kalimin drejt vendeve të BE-së, kundrejt pagesës 50-150 euro për person;
- L. L., 34 vjeç, banues në Korçë, për veprën penale “Ndihma për kalim të paligjshëm të kufijve”, pasi është kapur nga shërbimet e Policisë, në aksin rrugor Labinot-Elbasan, duke transportuar me një automjet, 4 emigrantë të paligjshëm, të cilëve iu kishte premtuar kalimin drejt vendeve të BE-së, kundrejt pagesës.
Në cilësinë e provës materiale janë sekuestruar 2 automjetet, 4 aparate celulare dhe një sasi parash e dyshuar e përfituar nga kjo veprimtari e paligjshme.
Vijon puna për identifikimin dhe kapjen e personave të tjerë të përfshirë në këtë veprimtari kriminale.
Materialet proceduriale i kaluan Prokurorisë pranë Gjykatës së Shkallës së Parë Elbasan, për veprime të mëtejshme.
