Një ngjarje e rëndë është regjistruar në Itali ku shqiptari Selami Bodi ka mbytur për motive xhelozie gruan e tij Etleva Kanolja Bodi. Ndërkohë që Erjon Kanolja, vëllai i Etleva Bodit ka treguar më shumë detaje lidhur me ngjarjen e rëndë.
Vëllai i shqiptares 31-vjeçare ka treguar se bisedën e fundit me motrën e ka patur një ditë para se të ndodhte ngjarja. Ndër të tjera ai shprehet se motra e tij ishte në regjim shtrati pasi ishte operuar dhe kishte hequr apendicitin vetëm 3 ditë para ngjarjes.
Vëllai i viktimës i bën thirrje shtetit italian që të kujdeset për fëmijët e motrës së tij pasi atyre iu ka vdekur mamaja, ndërsa babai është arrestuar pasi akuzohet për vrasjen e gruas.
“Shkaqet e konfliktit ishte xhelozia. Motra nuk ka pasur telefon. Ai e kuptoi pas shumë kohe. Se po të ishte informuar ambulanca në kohë, do të ishte gjallë motra. Ai është munduar, por dëmi ishte i madh. Kishte shkaktuar dëme cerebrale te motra. Shpresë kishim, shpresonim mrekulli.
Ishte dhe në dorë të fatit. Një ditë më parë kisha folur unë. Nuk kam biseduar me të tjerët. Kemi folur; si je, a je mirë? Kalo të rrimë pak më tha. Kalova dhe pimë kafe te shtëpia. Çdo gjë dukej normale. Ditën e nesërme ndodhi ngjarja. Nuk pashë asnjë lloj shqetësimi. Isha sepse ka qenë e operuar 3 ditë më parë nga apendiciti. Nuk arrinte që të çohej. Ishte në regjim shtrati. Kërkoj ndihmë për mbështetjen për fëmijët. Për motrën, çdo kush që ka mundësi, që të na ndihmojë”, shprehet vëllai i viktimës.
