Nëna e Leo Sadikut, 12-vjeçarit që ndërroi jetë më 8 janar në QSUT, ka ngritur akuza ndaj mjekëve që e trajtuan djalin e saj, duke i fajësuar ata për neglizhencë dhe duke e lidhur këtë me pasojat që çuan në vdekjen e tij.
Roveta Sadiku, në një gjendje shumë të rënduar emocionale, tregon se djalin e saj e çuan për herë të parë në Spitalin e Korçës më 28 dhjetor. Pas marrjes së mjekimit, mjekët e dërguan atë në shtëpi.
Megjithatë, më 29 dhjetor, pasi gjendja e tij nuk përmirësohej, ata u kthyen në spital. Pas disa vizitave, djali u shtrua për trajtim.
Sipas nënës, Leo po vuante nga dhimbje të vazhdueshme barku, diarre dhe të vjella.
Roveta tregon momentet e fundit të jetës së Leos, i cili sipas saj, ndërroi jetë në duart e dajës së tij.
“Leo kishte një djegie të paparë në trup dhe donte të zbulohej. Po digjej, kam zjarr më thoshte. Ia thamë doktoreshës por nuk bëri asgjë. Djali e pashë që i kishte duart e ftohta dhe goca ka marrë në një lokal ujë të ngrohtë që t’ia vinim në këmbë dhe duar. Në një moment Leo u ngrit i trembur. I thashë çfarë ke bir i mamit? Asgjë më tha mos ki frikë se asgjë nuk kam. Mos qaj se nuk ka asgjë më tha djali. Më kërkoi të shtrihesha pas tij. I thashë është turp të keqen mami se ka njerëz. Mami të lutem shtrihu pas meje më lër të të puth, më puth, më shtrëngo fort po më thoshte djali. U shtriva pas djalit dhe po e përkëdhelja, nuk e dija që po i plotësoja dëshirat e fundit. Nuk zgjati shumë. Bëri një frymëmarrje jo të mirë. I thërrita Leo bir çfarë ke? Më tha nuk mbushem dot me frymë. Lajmërova direkt, nuk erdhi doktoresha por erdhi një infermiere me një matës oksigjeni në dorë. Ia vendosi në dorë dhe matësi nuk punonte në dorën e Leos. Leo kaloi një krizë, i kërcyen sytë përpjetë. Në atë moment kemi thirrur si të marrë. Një zotëri ka ardhur nga një dhomë tjetër, na nxorrën me dhunë jashtë mua dhe tim vëlla. Kur më pa vëllai që po ulërija hyri me forcë. Një zotëri tjetër mori bombolën e oksigjenit, e vendosën aty dhe vetëm i thërrisnin Leo shtrëngo dajën, Leo mendo për mamin. I luteshim të bëhej i fortë, por Leon ma kishin shkatërruar, ma neglizhuan”, ka rrëfyer ajo.
