Një operacion policor i koduar “Storm 4” ka zbuluar një rrjet të organizuar prostitucioni në lagjen nr. 13 të Plazhit në Durrës, ku katër shtetase kineze janë arrestuar dhe dhjetë persona të tjerë janë proceduar penalisht.
Sipas Policisë së Shtetit, aktiviteti kriminal ishte organizuar në një vilë dykatëshe të marrë me qira, e cila ishte përshtatur për ushtrimin e prostitucionit.
Hetimet u zhvilluan për dy javë me metoda proaktive dhe çuan në arrestimin e shtetases kineze F. W., 46 vjeçe, e dyshuar si organizatore e rrjetit të prostitucionit.
Bashkë me të u arrestuan edhe tri shtetase të tjera kineze:
• L. M., 55 vjeçe
• L. Ch., 49 vjeçe
• Zh. H., 47 vjeçe
Të katërat akuzohen për veprat penale “Shfrytëzimi i prostitucionit” dhe “Prostitucioni”. Gjithashtu janë proceduar në gjendje të lirë dy shtetase kineze dhe tetë shtetas shqiptarë për përfshirje në të njëjtin aktivitet të paligjshëm.
Policia ka shpallur në kërkim edhe një shtetase britanike, K. P., 46 vjeçe, e dyshuar si bashkëorganizatore dhe personi që kishte marrë me qira vilën ku zhvillohej aktiviteti.
Gjatë kontrollit në objekt u sekuestruan:
• 6 pasaporta të shtetaseve kineze
• shuma parash në euro dhe dollarë
• disa karta bankare dhe karta telefoni
Sipas hetimeve paraprake, ekziston dyshimi se veprimtaria është e lidhur me rrjete më të gjera që veprojnë nga jashtë territorit shqiptar, ku komunikimi me klientët mund të jetë realizuar përmes një call center-i.
Materialet e mbledhura nga operacioni “Storm 4” janë referuar Prokurorisë së Juridiksionit të Përgjithshëm në Durrës për hetime të mëtejshme. Hetimet po vazhdojnë për të identifikuar persona të tjerë të përfshirë në këtë rrjet prostitucioni ndërkombëtar.
