Autoriteti Kombëtar i Ushqimit në Shkodër ka sekuestruar 124 kilogramë mish pa vulë kontrolli dhe pa certifikatë veterinare, në kuadër të kontrolleve të kryera në tregjet e zonës.
Përveç sekuestrimit të produktit, janë vendosur gjoba që në total kapin vlerën e 600 mijë lekëve. Gjithashtu, janë bllokuar dy subjekte që rezultonin të paregjistruara në Qendrën Kombëtare të Biznesit.
Kontrollet janë zhvilluar në kuadër të përhapjes së murtajës së ruminantëve të vegjël, një sëmundje ngjitëse që po përhapet me ritme shqetësuese në të gjithë vendin.
Sipas të dhënave të fundit, janë identifikuar 10 vatra infeksioni dhe 12 ferma me blegtori të infektuar. Deri më tani janë asgjësuar rreth 1200 krerë, ndërsa rastet e reja po përhapen nga veriu në jug, përfshirë zonat e Gjirokastrës dhe Konispolit.
Fermerët raportojnë mungesë mbështetjeje dhe mungesë informacioni, ndërsa Ministria e Bujqësisë deri tani ka ofruar vetëm këshilla të përgjithshme, pa një plan konkret për kompensimin e dëmeve.
Ekspertët shpresojnë se temperaturat e larta të verës mund të ngadalësojnë përhapjen e virusit, megjithatë theksojnë se ndalimi i tij kërkon bashkëpunim të ngushtë me fermerët dhe forcim të kontrollit në tregje dhe pika kufitare.
Aktualisht, sëmundja është përhapur në Shkodër, Dibër, Bulqizë, Tiranë, Korçë, Devoll, Skrapar, Lushnjë dhe Gjirokastër. Sipas burimeve zyrtare, përhapja fillestare lidhet me futjen kontrabandë të kafshëve nga Rumania, të shoqëruara me dokumente të falsifikuara.
Çfarë është PPR?
Murtaja e ruminantëve të vegjël është një sëmundje virale shumë ngjitëse që prek delet dhe dhitë. Ajo përhapet përmes kontaktit të drejtpërdrejtë me kafshë të infektuara, përmes sekrecioneve, jashtëqitjeve dhe në ajër në mjedise të mbyllura. Simptomat përfshijnë temperaturë të lartë, rrjedhje nga sytë e hundët, inflamacion në gojë, probleme në frymëmarrje, diarre dhe humbje oreksi.
