Ministria e Ekonomisë, Kulturës dhe Inovacionit ka ngritur një grup pune për të verifikuar mënyrën e menaxhimit të Teatrit Kombëtar nën drejtimin e Altin Bashës, pas denoncimeve të bëra nga emisioni investigativ “Piranjat”.
Ministria ka urdhëruar shqyrtimin e të gjitha procedurave dhe ka theksuar se do të merren masat ligjore të nevojshme pas verifikimit të dokumenteve dhe fakteve të raportuara.
Denoncimet lidhen me abuzime të mundshme me buxhetin e institucionit, përfshirë blerjen e kostumeve të aktorëve dhe dhënien selektive të shfaqjeve.
REAGIMI:
Ministria e Ekonomisë, Kulturës dhe Inovacionit ka ndjekur me vëmendje, sikurse me shqetësim, zhvillimet e fundit mbi kronikat e transmetuara nga një emision investigativ lidhur me menaxhimin në Teatrin Kombëtar.
Për të garantuar transparencën dhe përgjegjshmërinë institucionale, Ministri i Ekonomisë, Kulturës dhe Inovacionit, më datë 23.12.2024 ka urdhëruar ngritjen e një grupi pune për të inspektuar situatën dhe aludimet e ngritura lidhur me disa aspekte të produksionit në Teatrin Kombëtar.
Pas shqyrtimit me detaje të të gjithë dokumentacionit dhe fakteve të raportuara, do të vlerësohet përputhshmëria dhe do të merren masat ligjore të nevojshme.
