Edhe pse me kabient të ri qeveritar, duket se Rama disa detaje nuk i ka marrë parasysh në përzgjedhjen e re, e sidomos në atë të Ministrit të Jashtëm.
Ministri i ri, Gent Cakaj, i cili zëvendëson Ditmir Bushatin, siç tregojnë burime të Politiko.al, nuk është ende I pajisur me Certifikatën e Sigurimit të Personelit (CSP).
CSP është dokumenti zyrtar i Drejtorisë së Sigurimit të Informacionit të Klasifikuar i cili vërteton nga pikëpamja e sigurisë se një individ i plotëson kushtet e përcaktuara për njohjen, ruajtjen, administrimin dhe transferimin e informacionit të klasifikuar.
Ajo që është e rëndësishme të përmendet është që në momentin që një individ emërohet në këtë post, të pasurit e kësaj certifikatë është domosdoshmëri, për shkak të informacionit të klasifikuar që kalon nga ajo zyrë që i takon NATO-s, BE-së, shteteve dhe organizatave të tjera ndërkombëtare.
Sipas Politiko.al, nivelet dhe tipet e Certifikatës së Sigurimit të Personelit janë: Konfidencial; Sekret; Tepër sekret.
Afati për të pajisur me CSP nga Drejtoria e Sigurimit të Informacionit të Klasifikuar, që nga momenti i aplikimit, zgjat 120 ditë, ndërkohë që Gent Cakaj, duke llogaritur periudhën si zv/ministër i Jashtëm, e ka tejkaluar këtë periudhë.
Përpara se të emërohej në postin e zv/ministrit, Cakaj ka qenë këshilltar i kryeministrit Edi Rama, dhe më vonë zv/ministër i Jashtëm.
