Koalicioni “Bashkë Fitojmë” ka vijuar turin në kuadër të zgjedhjeve lokale në Kurbin. Kryetari i Partisë së Lirisë Ilir Meta u premtoi qytetarëve se pas datës 14 do marrë fund monizmi dhe bashkitë do iu kthehen qytetarëve.
“Edhe tre ditë dhe Bashkia e Kurbinit do u takojë qytetarëve. Do t’i japë fund 4 vjeçarit të bashkisë bunker të Kurbinit, e do ta hapë për qytetarët pa dallim.
Kryetari i ardhshëm i bashkisë, kandidati ynë, do sjellë transparencën në vend të korrupsionit.
Qytetarët nuk do intimidohen më as nga fatkeqësi si ajo e tërmetit, ku fondet u përdorën për të blerë kolltuqe zyrash.
Kryetari i ardhshëm do të marrë çdo vendim në interesin tuaj dhe të komunitetit.
Në 14 maj merr fund monizmi absolut dhe arroganca absolute.
E vetmja garë që ka Behar Haxhiu është ajo me kandidatët tanë në bashki të tjera, se kush do të dërrmojë më shumë bandën e Rilindjes”, tha Meta.
Ndërkohë kandidati për Kurbinin Behar Haxhia tha se do të jetë gjithnjë në krah të qytetarëve dhe do të përmbushë pritshmërinë e tyre.
“Sot jemi në fund të fushatës, ndaj për secilin prej jush kam një falënderim të përzemërt. Ju premtoj se çdo ditë në krye të detyrës do të jem në lartësinë dhe pritshmërinë tuaja. Unë nuk jam njeri i fjalëve pasi gjithë jetën kam punuar, dhe për mua flasin puna dhe eksperienca.
Më 14 maj Kurbini do jetë në ballë të betejës për të mbrojtur pluralizmin. Mbështetje për shtresat në nevojë, të moshuarit dhe rininë. Në këtë 4 vjeçar do të mbyllim plagët e tërmetit duke finalizuar projektin e rindërtimit. Prioritet do jetë bujqësia dhe blegtoria. Do asistojmë fermerët dhe blegtorët”, u shpreh ai gjatë fjalës së tij.
