Në një tryezë të organizuar për bujqësinë, Presidenti i Partisë së Lirisë, Ilir Meta, ka bërë një deklaratë të fortë duke shprehur qëndrimin e partisë ndaj politikave të qeverisë aktuale. Ai ka akuzuar qeverinë për një politikë të qëllimshme shpopullimi, duke e cilësuar si një veprim që dëmton thellësisht jetën rurale dhe bujqësinë.
“Rama ka bërë një zgjedhje, ideologjike e politike, ka zgjedhur që Shqipërinë e shqiptarët t’i vendosë nën qeverisjen globale. Ne mendojmë se duhet të qeverisen nga vullneti i tyre për të qenë krenar për atë që jemi e për të ruajtur Shqipërinë edhe për shekujt që vijnë sepse globalizmi është vdekjeprurës për popujt që nuk mbrojnë rrënjët e tyre,” tha Meta.
Sipas tij, një nga shtyllat kryesore të kësaj shpopullimi është braktisja e fshatit dhe sektoreve tradicionale si bujqësia dhe blegtoria. Meta argumentoi se kjo braktisje është rezultat i politikave të qeverisë dhe ka sjellë një situatë ku fermerët në zona si Kolonja dhe Korça janë të detyruar të hedhin produktet e tyre apo të mbyllin fermat për shkak të mungesës së mbështetjes nga qeveria.
Presidenti i PL theksoi se programi i tyre për bujqësinë synon të rikthejë shpresën dhe të ndihmojë në mbështetjen e fermerëve dhe të bujqve. “Përmes programit tonë i japim një goditje shpopullimit, axhendës së qëllimshme të Rilindjes që ka falimentuar këtë sektor jetik për vendin. Që në vitin e parë buxheti do të jetë 30 milionë, do të heqim zgjedhën tatimore,” shtoi Meta.
Duke folur për potencialin e Shqipërisë në bujqësi, Meta u zotua të vizitojë çdo shqiptar që është i gatshëm të rrijë në vendin e tij ose të kthehet, për t’u shpjeguar programin e Partisë së Lirisë për zhvillimin e bujqësisë dhe të jetës në fshat. Kjo, sipas tij, është një përpjekje për të ruajtur dhe valorizuar resurset dhe traditat vendase.
