Kancelarja Angela Merkel e ka pranuar se Gjermania nuk ka bërë mjaftueshëm për uljen e emetimeve të karbonit në mënyrë që të arrinte objektivat e vendosura nga marrëveshja e klimës në Paris.
Në konferencën e saj të fundit vjetore të enjten, para se të largohet nga detyra si udhëheqëse e ekonomisë më të madhe të Europës, Merkel tha se Gjermania ka bërë shumë për të përshtatur ekonominë e saj përballë krizës së klimës, duke u rritur përqindja e burimeve të rinovueshme në përzierjen e saj të energjisë nga 10% në 40%, dhe uljen e emetimit të karbonit me 20% në periudhën nga 1990 në 2010 dhe me 20% të tjera në 10 vitet që nga ajo kohë.
Por ajo pranoi se ajo që është arritur nuk është e mjaftueshme, matur me termat e marrëveshjes së parisit për të kufizuar ngrohjen globale. Jo vetëm Gjermania, por e gjithë bota nuk kishte arritur të përmbushte objektivat e saj, tha ajo.
“Unë jam pajisur me sens të mjaftueshëm për shkencën për të parë që rrethanat objektive kërkojnë që ne të mos mund të vazhdojmë me ritmin aktual, por duhet të ngremë lart tempin”, tha Merkel.
Kancelarja tha se Gjermania nuk mund ta bëjë e vetme një gjë të tillë, por mund të bëhet një shembull për të tjerët.
Çështja e ndryshimeve klimatike është kthyer në një shqetësim serioz për agjendën politike, pasi reshjet e dendura të shiut shkaktuan përmbytje të mëdha në Gjermaninë Perëndimore, me më shumë se 170 viktima. Dhe duket se gjithçka nuk ka mbaruar këtu, pasi shërbimi kombëtar i motit në Gjermani ka parashikuar sërish reshje në rajonet e përmbytura gjatë fundjavës.
