Gjatë konferencës së sotme për mediat kreu i PD, Sali Berisha e ka cilësuar projektin për Portin e Durrësit si aktin madhor të një grupi të strukturuar kriminal për t’ju grabitur pasurinë shqiptarëve. Berisha akuzoi Ramën se ka shkrirë aksionet me Bashën për t’ju bërë gjëmën shqiptarëve dhe se menaxheri i Emaar është dhe menaxheri i kompanisë Basha.
“Çështje tjetër, jashtëzakonisht e rëndësishme e rendit të ditës është afera mafioze, korruptive në historinë e Shqipërisë dhe të Europës, porti i Durrësit.
Porti i Durrësit përbën aktin më madhor të krimit ekonomik të një organizate të strukturuar kriminale, me të cilin shqiptarëve u grabitet pasuria e tyre kombëtare numër një.
Përbën aktin mafioz, me të cilin Edi Rama shkriu aksionet dhe me ish-kreun e opozitës, për t’i bërë gjëmën shqiptarëve dhe pluralizmit politik.
Përbën aktin…dhe kur e them këtë, duhet të sqaroj shqiptarët, se kur mediat njoftuan se menaxheri i Emaar dhe menaxheri i kompanisë familjare, Basha, ishte i njëjti person, çfarë ndodhi?
U them këtu atyre që thonë se po bëj politikë, nuk po bëj politikë. E konsideroj një nga zhvillimet më tragjike të vendit; ky menaxher doli e tha se dhashë dorëheqjen nga kompania Basha.
I pari, unë e besova që dha dorëheqjen. Por unë dhe të gjithë ata që besuam se kjo ndodhi, gabuam. Sepse pikërisht kjo nuk kishte ndodhur. Ky ishte një mashtrim, sepse një muaj më vonë, ky dopio-menaxher, u gjet se vazhdonte punën në kompaninë Basha.
Menaxheri nuk dha dorëheqje nga Emaari, nuk deklaroi se do dorëhiqej dhe do mbetej menaxher i Bashës. Por pas një muaji ai vazhdonte menaxher i të dy kompanive.
Këtu, ky përbën një akt shekspirian në kuptimin e gllabërimit të opozitës, e kreut të opozitës në një aferë të tmerrshme mafioze.
