Gjykata Kushtetuese ka vendosur të kalojë për shqyrtim publik vendimin e qeverisë shqiptare për të ndaluar përdorimin e platformës TikTok, duke e vlerësuar çështjen me rëndësi për rendin kushtetues.
Megjithatë, kërkesa për pezullimin e menjëhershëm të këtij vendimi është rrëzuar. Palët e përfshira në proces janë Asociacioni i Gazetarëve të Shqipërisë, Autoriteti Kombëtar për Sigurinë Kibernetike dhe Agjencia Kombëtare e Shoqërisë së Informacionit.
AGSH reagoi menjëherë pas vendimit, duke e cilësuar ndalimin e TikTok si një masë të ndërmarrë pa transparencë dhe pa një analizë të qartë të ndikimit.
Në një deklaratë publike, organizata e gazetarëve thekson se ky ndalim përbën precedent të rrezikshëm për lirinë e shprehjes dhe të drejtën për informim, të mbrojtura nga Kushtetuta dhe Konventa Evropiane për të Drejtat e Njeriut.
“Asociacioni i Gazetarëve të Shqipërisë mirëpret faktin që çështja do të shqyrtohet në seancë plenare publike. Ky është një hap i domosdoshëm për të garantuar një proces transparent dhe gjithëpërfshirës përballë një vendimi që ndikon drejtpërdrejt në të drejtat qytetare,” thuhet në reagim.
AGSH nënvizon se mbyllja e një platforme të komunikimit publik nuk është zgjidhje për sfidat e sigurisë, por një kufizim i panevojshëm i hapësirës për debat.
