Mbrëmja festive nuk regjistroi asnjë ngjarje të rëndë, sikundër ka ndodhur në vitet pararadhës.
Kanë ndodhur vetëm dy incidente me plasjen e fishekzjarreve.
Një 60-vjeçari në qytetin e Vlorës dhe një 9-vjeçari në Librazhd u ka plasur kapsolla në dorë.
Fatmirësisht kjo ka shkaktuar vetëm lëndime të vogla.
Ky lajm është bërë i ditur nga Policia e Shtetit, e cila ka shkruar në faqet zyrtare online se nuk ka ndodhur asnjë ngjarje kriminale apo konflikt me pasoja.
Po ashtu, në njoftim thuhet se në të gjitha qarqet nuk është evidentuar asnjë aksident rrugor me pasojë jetën.
Ky njoftim mbyllet me lajmin se pas mesnatës kanë ardhur në jetë një vajzë e një djalë.
Postimi i Policisë:
“Falë masave parandaluese të marra para, gjatë dhe pas natës së ndërrimit të viteve, si dhe falë qytetarisë së treguar nga qytetarët, në të gjithë vendin, gjatë natës se ndërrimit të viteve dhe deri në këto momente nuk është shënuar asnjë ngjarje kriminale, si dhe nuk është evidentuar asnjë konflikt me pasoja.
Në të gjitha qarqet nuk është evidentuar asnjë aksident rrugor me pasojë jetën.
Janë ushtruar kontrolle me dragera dhe duke marrë shkas nga numri i mjeteve në qarkullim, verifikimi i rasteve të drejtimit të mjetit nën efektin e alkoolit ishte minimal.
Policia e Shtetit vijon të jetë në gatishmëri, “Shërbim të përforcuar”, për të garantuar rendin dhe sigurinë gjatë festimeve në vijim.
Policia e Shtetit uron gjithë qytetarët gëzuar Vitin e Ri 2020, mirësi, paqe e begati e sa më shumë besim e bashkëpunim mes nesh, për të mirën e përbashkët.
Mbrëmjen e 31 dhjetorit shqiptarët festuan ndërrimin e viteve, duke lënë pas edhe ngjarjen tragjike të 26 nëntorit që tronditi Shqipërinë. Qytetarët vazhduan traditën si për çdo vit dhe nuk harruan spektaklin e fishekzjarreve kur akrepat shënuan 00:00. Por me plasjen e fishekzjarreve pati edhe aksidente, ku një 60-vjeçari në qytetin e Vlorës i plasi kapsolla në dorë, po ashtu të njëjtën incident përjetoi edhe një djalë 9-vjeçar në Librazhd. Gjithashtu pas mesnate, zyrtarisht në vitin 2020 kanë ardhur në jetë edhe dy bebet e para, një djalë dhe një vajzë.”
