Ditën e sotme në Konferencën e Donatorëve u mblodhën 1 milardë e 150 milion euro, për të ndihmuar në rindërtimin e Shqipërisë pas tërmetit shkatërrimtar të 26 nëntorit.
Në përfundim të Konferencës, kryeministri Edi Rama falenderoi të gjithë shtetet kontribuese.
Shefi i qeverisë nuk i ka fshehur emocionet, ndërsa ka cituar edhe disa pjesë nga Bibla dhe Kurani.
Kjo është përtej imagjinatës së shfrenuar, nuk di ç’të them por më lejoni të jem mistik se në ç’mënyrë tjetër mund të shpjegoj këtë. Më lini të citoj diçka nga Bibla, Korinthët ku thuhet ‘’Në një frymë u pagëzuam nga një trup e të gjithë pimë nga e njëjta frymë. Nëse një pjesëtar nderohet të gjithë gëzohen’’. Dhe ndërsa citoj Biblën, edhe Papa Francesku e ka pagëzuar por nuk mund të rrij pa cituar edhe Kuranin. ‘’Njerëzimi është një komb i vetëm’’, tha Rama.
Gjithashtu kreu i qeverisë nuk la pa falenderuar edhe presidenten e Komisionit Europian, Ursula von der Leyen, e cila ishte organizatorja e Konferencës.
Ndër të tjera Rama tha dy fjalë edhe për presidentin francez Emmanuel Macron, i cili para pak muajsh vuri veton për negociatat e BE me Shqipërinë dhe Maqedoninë e Veriut.
“E di se presidenti Makron e ka pritur me padurim për këtë eveniment sot, më përcolli urimin më të mirë dhe natyrisht e ndjesën që nuk ishte i pranishëm dot këtu”, tha Rama.
