Këshilli Mbikëqyrës i Bankës së Shqipërisë zhvilloi sot një mbledhje online, ku u morën disa vendime të rëndësishme, për situatën e krijuar nga COVID-19.
Banka e Shqipërisë ka urdhëruar pezullimin e shpërndarjes së fitimit nga bankat e nivelit të dytë.
Në bazë të vendimit është pezulluar fitimi vjetor i 2019-ës dhe gjashtëmujorit të parë të 2020-ës.
Me këtë masë Banka e Shqipërisë synon të mbështesë kredidhënien drejt individëve dhe bizneseve gjatë periudhës së epidemisë.
Gjithashtu Këshilli Mbikëqyrës vendosi të ulë me 50%, honoraret e anëtarëve të tij dhe pagat e administratorëve dhe drejtorëve të Bankës së Shqipërisë.
Qeveria ka miratuar një paketë në ndihmë të biznesit, ku i lejon që të marrë kredi, nëse nuk mund të shlyejë pagat e punonjësve.
Vlera e huasë për bizneset, nuk duhet të kalojë 3 paga mujore dhe vlera e pagës së një punonjësi nuk mund të jetë më e lartë se 150 mijë lekë.
Në çdo rast dhënia e kredisë do të realizohet sipas politikave të brendshme të çdo banke në lidhje me riskun e kredisë, por bankat e nivelit të dytë do të sigurojnë procedura të thjeshtuara dhe kohë shumë të shpejtë të procesimit të kerkeses së kredisë.
Në instrumentin e kredisë së garantuar nga kredia sovrane, biznesi mund të përfitojë një periudhë pa pagesë principali, jo më pak se 3 muaj.
Bankat e nivelit të dytë nuk do të aplikojnë kosto administrative mbi kredinë dhe do të ofrojnë një normë interesi preferenciale, të barabartë me normën mesatare të interesit të tre ankandeve të fundit të bonove të thesarit 12 mujore plus një marzh prej 0.5%, por në asnjë rast jo më të lartë se 2.85%.
Subjektet private duhet të përcjellin kërkesat e aplikimit për kredi pranë njërës prej bankave të nivelit të dytë, jo më vonë se 30 ditë nga data e nënshkrimit të Marrëveshjes së Garancisë Shtetërore mes Këshillit të Ministrave dhe Bankës përkatëse.
