Janë intensifikuar hetimet për ngjarjen tragjike në shkollën “Fan Noli”, ku i mituri Mario Përlleshaj vrau bashkëmoshatarin Martin Cani. Pas kaq kohësh, një hetim i veçantë po zhvillohet ndaj stafit shkollor për shpërdorim detyre, pasi nuk ndërhynë në konfliktin fillestar mes nxënësve.
Burime për “Top Channel” tregojnë se oficerja e sigurisë J.K., e cila shërben në këtë shkollë prej 18 muajsh, ka dëshmuar para grupit hetimor. Sipas saj, pasi u informua për përplasjen mes nxënësve, njoftoi menjëherë drejtoreshën, mësuesen kujdestare dhe psikologen. Sherri filloi kur një mësuese dëgjoi sharje për nënat mes dy nxënësve.
“Kontrollova tualetin por nxënësit nuk ishin aty. Martini më shpjegoi se kishte sharë pa qëllim dhe Mario e kishte marrë personalisht. Kur bisedova me Marion, ai mohoi çdo problem”, shprehet oficerja në dëshminë e saj. Krimi ndodhi pas orës së gjashtë të mësimit.
Kamerat e sigurisë kanë kapur Mario Përlleshajn duke u larguar me një objekt që duket si thikë. Në dëshminë e tij, 14-vjeçari pohon se e njihte Martinin si nxënës të klasës së 9-të paralele.
“Nuk kemi pasur konflikte më parë. Atë ditë, Martini më thirri për sqarim. Ishte me dy-tre persona të panjohur. U ndava nga shoku im dhe u afrova. Ndërsa ecnim, shokët e tij na ndiqnin. Kur ndaluam, më sulmuan”, deklaron Mario.
Dëshmitarët tregojnë se Luisi, shoku i Marios që mbeti i plagosur, goditi i pari me grusht në gjoks Martinin. Gjatë momenteve të tensionuara, u dëgjua pyetja kërcënuese “o çuna, a dini ndonjë vend ku blihen buqeta me lule?”
Pavarësisht kërkesave të përsëritura për ndryshim mase dhe dorëzimit të dëftesës me nota të mira, Mario Përlleshaj vazhdon të qëndrojë në burgun e të miturve.
Gjykata argumenton se vepra penale “vrasje në rrethana cilësuese ndaj të miturit” parashikon dënim minimal 20 vjet ose burgim të përjetshëm.
