Bonusi për fëmijët e porsalindur tashmë është bërë fakt dhe mënyrën sesi ta përfitoni atë na e tregon Ministrja e Shëndetësisë dhe Mbrojtjes Sociale, Ogerta Manastirliu.
Manastrliu është shprehur se bonusi i bebes do të përfitohet menjëherë pasi fëmija të regjistrohet në zyrën e posaçme.
“Bonusi i bebes do të përfitohet menjëherë nëse fëmija regjistrohet në zyrën e posaçme të hapur pranë çdo materniteti në vend dhe përfitohet në dy pjesë nëse prindërit zgjedhin ta regjistrojnë të porsalindurin më vonë në gjendjen civile”, është shprehur ministrja.
Këtë deklaratë ministrja Manastiruliu e ka bërë nga maternitetet e Tiranës, ku ka vizituar 14 fëmijët që kanë ardhur në jetë.
Prej ditës së sotme nis zyrtarisht politika e re socialie, e cila mbështet familjet e reja.
- Pagesa për lindjen e fëmijës së parë është 40 mijë Lekë;
- Për fëmijën e dytë 80 mijë Lekë;
- Për fëmijën e tretë, të katërt e në vijim bonusi i bebes është 120 mijë Lekë për çdo fëmijë;
- Për nënat që lindin binjakë masa e përfimit do të jetë në masën 80 000 (tetëdhjetë mijë lekë) për secilin fëmijë;
- Për nënat që lindin trinjakë dhe më shumë, masa e përfimit do të jetë në masën 120 000 (njëqind e njëzetë mijë lekë) për secilin fëmijë.
Duke filluar nga sot, prindërit e kryejnë regjistrimin e fëmijës së porsalindur në Maternitet në sportelin e gjendjes civile të hapura në 37 maternitete të vendit, duke lehtësuar dhe procedurën e regjistrimit fillestar të të porsalindurve.
Bonusi i bebes është i ndarë në dy pjesë. Çeku i parë përfitohet menjëherë (35 mijë lekë për fëmijën e parë; 75 mijë për fëmijën e dytë dhe 115 mijë për fëmijën e tretë) ndërsa çeku I dytë me vlerë 5 mijë lekë përfitohet pas regjistrimit të fëmijës në gjendjen civile.
Pagesa do të kryhet në bankë dhe çeku ka vlefshmëri deri në 12 muaj nga data e lëshimit të tij.
Bonusi është universal, ndaj përfitohet nga të gjitha familjet, pavarësisht se ku vendos nëna që të sjellë në jetë fëmijën. Për fëmijët që lindin në spitale private, në shtëpi ose jashtë vendit, çeku i bebes do të lëshohet nga Ministria e Shëndetësisë dhe Mbrojtjes Sociale, pas regjistrimit të të porsalindurit në zyrat e gjendjes civile.
