Malajzia ka kërkuar zgjatjen e armëpushimit në Mianmar, pas tërmetit shkatërrues të marsit, pavarësisht se luftimet vazhdojnë në terren dhe sfidojnë efektivitetin e marrëveshjes aktuale.
Armëpushimi, i shpallur nga junta ushtarake pas tërmetit që vrau rreth 3,800 njerëz dhe la mijëra të pastrehë, pritet të skadojë në fund të majit.
Edhe pse është zgjatur më herët, raportimet nga monitoruesit e konfliktit dhe Kombet e Bashkuara tregojnë se sulmet ajrore dhe përleshjet kanë vazhduar.
Në një takim të ministrave të jashtëm të ASEAN-it të dielën, shefi i diplomacisë malajziane, Mohamad Hasan, kërkoi që armëpushimi të zgjerohet përtej zonave të prekura nga tërmeti dhe të shtrihet në të gjithë vendin.
“U bëjmë thirrje të gjitha palëve në Mianmar të ndalojnë armiqësitë dhe të zgjerojnë armëpushimin, për të lehtësuar vuajtjet e popullit dhe për të hapur rrugën drejt një procesi të gjatë rimëkëmbjeje”, u shpreh ai gjatë fjalës së tij hapëse.
Malajzia mban aktualisht kryesinë e rradhës të Shoqatës së Kombeve të Azisë Juglindore, një bllok prej 10 vendesh që prej grushtit të shtetit në shkurt 2021 ka dështuar të realizojë përparim të prekshëm drejt paqes në Mianmar.
Plani paqeje me pesë pika, i rënë dakord në prill 2021 mes liderëve të ASEAN-it dhe juntës, ka mbetur kryesisht në letër.
Për pasojë, përfaqësuesve të juntës u është ndaluar pjesëmarrja në samitet zyrtare të bllokut.
Ndërkohë, kryeministri malajzian Anwar Ibrahim është përpjekur të ndërmjetësojë përmes diplomacisë direkte. Gjatë një takimi me liderin ushtarak të Mianmarit, Min Aung Hlaing, në prill në Bangkok, ai i kërkoi këtij të fundit respektimin e armëpushimit.
Megjithatë, dhuna ka vazhduar. Në mes të majit, një sulm ajror i ushtrisë goditi një shkollë pranë epiqendrës së tërmetit në rajonin Sagaing, duke vrarë 22 persona, përfshirë 20 fëmijë, sipas dëshmitarëve.
Ndërsa grupe të armatosura etnike dhe anti-grusht shteti kanë bërë thirrje të ndaluar për përplasjet, situata në terren mbetet e brishtë. Banorë në lindje të vendit kanë raportuar zhvendosje masive, pasi forcat rebele po përparojnë drejt qyteteve strategjike të kontrolluara nga junta në kufirin me Tajlandën.
Junta ka njoftuar planet për mbajtjen e zgjedhjeve në fund të vitit, por “Qeveria e Unitetit Kombëtar” e opozitës i ka bërë thirrje popullit dhe partive të bojkotojnë çdo votim të organizuar nga ushtria.
Pas takimit të tij me Min Aung Hlaing, Anwar deklaroi se ASEAN është e shqetësuar dhe kërkon të ndërtojë konsensus për “zgjedhje të drejta dhe të lira” një objektiv që, sipas shumë analistëve, duket i paarritshëm në klimën aktuale politike dhe ushtarake në Mianmar.
