Presidenti i Bjellorusisë Aleksandër Lukashenko urdhëroi të premten mbylljen e kufirit me Ukrainën, duke kërkuar të bllokonte atë që ai e quajti fluksin e armëve te puçistët, të zbuluar nga shërbimet e tij të sigurisë.
Masa duket se thellon një ngërç midis Bjellorusisë dhe fuqive të jashtme të nxitur nga qeveria e tij që detyroi ndalimin e një fluturimi Ryanair në maj dhe arrestimin e gazetarit Roman Protasevich, që ishte në bord.
Vendet perëndimore vendosën sanksione ndaj Bjellorusisë për ta ndëshkuar atë për veprimin dhe Bashkimi Evropian dhe Ukraina gjithashtu kanë ndaluar hyrjen në hapësirën e tyre ajrore të regjistruar në Bjellorusi.
Lukashenko, i cili ka akuzuar vazhdimisht “keqdashësit” perëndimorë se po përpiqeshin ta largonin nga pushteti, tha se ai kishte urdhëruar një spastrim në të gjithë vendin dhe grupet rebele që po planifikonin të kryenin një grusht shteti ishin zbuluar në Bjellorusi.
“Ata e kanë kapërcyer kufirin. Ne nuk mund t’i falim”, tha ai.
Duke folur në një mbledhje, në kremtimin e Ditës së Pavarësisë së vendit, udhëheqësi veteran tha se Gjermania, Lituania, Polonia, Ukraina dhe Shtetet e Bashkuara ishin prapa veprimtarisë së pretenduar rebele, njoftoi agjencia e lajmeve BelTA.
“Një sasi e madhe armësh po vjen nga Ukraina në Bjellorusi. Kjo është arsyeja pse unë urdhërova forcat e sigurisë kufitare të mbyllnin plotësisht kufirin me Ukrainën,” tha Lukashenko.
Zëdhënësi i ministrisë së jashtme të Ukrainës, Oleh Nikolaenko, tha se Ukraina as nuk kishte ndërhyrë në punët e brendshme të Bjellorusisë dhe as nuk po planifikonte ta bënte atë në të ardhmen.
“Pala ukrainase nuk ka marrë një njoftim zyrtar nga Bjellorusia mbi mbylljen e kufirit. Do të ishte kryesisht populli i Bjellorusisë që do të vuante nga një hap i tillë”, tha Nikolaenko.
Bjellorusia ndan një kufi me Ukrainën në jug. Kufizohet me Poloninë dhe Lituaninë në perëndim, Letoninë në veri dhe Rusinë në lindje.
Masa për të mbyllur kufijtë me Ukrainën vjen disa ditë pasi Bjellorusia tërhoqi përfaqësuesin e saj të përhershëm në Bashkimin Evropian për konsultime pasi Brukseli vendosi sanksione ekonomike.
