Ministri i Jashtëm rus, Sergey Lavrov, ka deklaruar se Moska nuk do të lejojë asnjë ndryshim në administrimin e centralit bërthamor të Zaporizhzhias, i cili aktualisht kontrollohet nga forcat ruse.
Ai theksoi se centrali vazhdon të menaxhohet nga kompania shtetërore Rosatom dhe se siguria është nën kontroll të plotë, pavarësisht akuzave për provokime nga pala ukrainase.
“Nuk kemi marrë asnjë propozim për ndryshim menaxhimi, dhe edhe nëse një i tillë na ofrohet, do të sqarojmë se termocentrali është nën administrimin e Rosatom dhe mbikëqyret nga Agjencia Ndërkombëtare e Energjisë Atomike,” u shpreh Lavrov. Sipas tij, përpjekjet e Ukrainës për të rikuperuar centralin janë të rrezikshme dhe mund të shkaktojnë një katastrofë bërthamore në rajon.
Duke folur gjithashtu për Krimenë, Lavrov përsëriti qëndrimin zyrtar të Kremlinit, duke e konsideruar gadishullin si pjesë të pandashme të territorit rus. “Krimea është pjesë e Federatës Ruse dhe nuk është objekt negociatash. Çështja është e mbyllur,” tha ai, duke përjashtuar çdo mundësi që territori t’i rikthehet Ukrainës.
Komentet e Lavrov vijnë në një kohë kur qarkullojnë raportime për një plan paqeje me shtatë pika të propozuar nga Shtetet e Bashkuara, i cili thuhet se përfshin njohjen e sovranitetit rus mbi Krimenë.
Megjithatë, Presidenti ukrainas Volodymyr Zelensky ka deklaruar në mënyrë të prerë se Ukraina nuk do të heqë dorë nga asnjë pjesë e territorit të saj, duke theksuar se një gjë e tillë bie ndesh me Kushtetutën e vendit.
