Kryetari i Kontrollit të Lartë të Shtetit, (KLSH) Arben Shehu, zhvilloi ditën e djeshme një takim me Drejtorin e Byrosë Kombëtare të Hetimit, (BKH), Aida Hajnaj në ambientet e KLSH-së.
Lajmin e bëri të ditur Kontrolli i Lartë i Shtetit (KLSH), përmes një njoftimi të publikuar në faqen zyrtare. Në këtë njoftim evidentohet se, fokus i këtij takimi ka qenë bashkëpunimi për të cuar në përballjen me drejtësinë të gjithë ata që shkelin ligjin dhe të korruptuarit në vend.
Sipas njoftimit, KLSH dhe BKH po punojnë që të përforcojnë më tej luftën kundër korrupsionit. “Në qendër të takimit ishte diskutimi për fusha me rëndësi të veçantë në të cilat do të fokusohet procesi i punës së Kontrollit të Lartë të Shtetit dhe Byrosë Kombëtare të Hetimit në vazhdimësi.
Kreu i KLSH-së dhe drejtuesja e BKH-së theksuan intensifikimin e punës për evidentimin dhe vendosjes para organeve të drejtësisë të shkelësve të ligjit.
Takimi i Shehut dhe Hajnajt është në vijimësi të takimeve dhe marrëveshjeve që KLSH ka bërë me institucione ligjzbatuese në vend në kuadër të rritjes së frymës së bashkëpunimit mes institucioneve me fokus kryesor luftën ndaj korrupsionit”, thuhet në njoftim.
BKH-ja e është një institucion i ngritur rishtas si pjesë e SPAK. Kjo strukturë e posaçme synon të ndëshkojë zyrtarët e korruptuar. Pas marrjes së detyrës në krye të KLSH-së, Shehu ka zhvilluar një sërë takimesh me titullarë të institucioneve në kuadër bashkëpunimit ndërinstitucional.
I tillë ishte edhe takimi i krye kontrollorit Shehu me drejtuesin e Prokurorisë së Posaçme Arben Kraja, i zhvilluar pranë ambienteve të SPAK. Edhe më këtë të fundit kreu i KLSH diskutoi rreth rritjes në vijim të bashkëpunimit mes institucioneve për forcuar sistemin e drejtësisë dhe për të luftuar botën e krimit dhe korrupsionit në vend.
“Nisur nga ndjeshmëria e opinionit publik për të luftuar korrupsionin, me synim rritjen e bashkëpunimit të institucioneve tona, për fushat me interes të përbashkët, forcimin e rolit dhe rritjen e ndikimit të aktivitetit për secilin prej institucioneve, në parandalimin e korrupsionit dhe abuzimeve nga administrata publike, konsiderohet si tejet i rëndësishëm bashkërendimi i aktiviteteve të institucioneve tona nëpërmjet një marrëveshje bashkëpunimi.
Marrëveshja e bashkëpunimit e cila do të konkretizohet me nënshkrimin e saj në vijim, do të jetë një hap konkret në rritjen e kontributeve institucionale në luftën kundër korrupsionit”, thuhej në njoftimin për shtyp./Gazetareforma.com/
