Drejtuesja e Byrosë Kombëtare të Hetimit (BKH), Aida Hajnaj, gjatë fjalës së saj në Kuvendin e Shqipërisë, vuri në pah përpjekjet e institucionit që ajo drejton në luftën kundër korrupsionit dhe krimit të organizuar.
Ajo e cilësoi ngritjen e BKH-së si një nga sukseset më të mëdha të reformës në drejtësi, duke theksuar rëndësinë e ndërtimit të një shteti ligjor dhe trajtimit të barabartë të të gjithë qytetarëve para ligjit.
Hajnaj njoftoi se BKH ka siguruar akses në 19 databaza të institucioneve shtetërore dhe ka nënshkruar disa marrëveshje bashkëpunimi, por ende ka sfida për marrjen e aksesit në databaza të tjera. “Korrupsioni godet sundimin e ligjit dhe cilësinë e jetës së qytetarëve.
Lufta kundër tij nuk mund të jetë e copëzuar, por duhet të jetë përpjekje e përditshme,” deklaroi ajo, duke bërë thirrje për bashkëpunim të ngushtë mes mekanizmave të brendshëm dhe partnerëve ndërkombëtarë.
Sipas saj, qëllimi kryesor i BKH-së është ndërtimi i një shteti të së drejtës dhe forcimi i institucioneve në funksion të qytetarëve. “Askush nuk mund të jetë mbi ligjin,” përfundoi Hajnaj.
