Prej disa vitesh, në Kukës po rritet ndjeshëm ndërgjegjësimi për ruajtjen dhe promovimin e pasurive natyrore të zonës.
Një nga zërat më aktivë në këtë drejtim është Andrit Shehu, i njohur për përkushtimin e tij në zhvillimin e turizmit lokal.Ai veçon si një nga destinacionet më të veçanta liqenin e Kallabakut, një perlë natyrore që gjithnjë e më tepër po tërheq vëmendjen e vizitorëve.
I fshehur mes maleve të Novosejt, liqeni mahnit me ujin e kristaltë, panoramën malore dhe mundësitë për sporte natyrore, si kajaku.
“Kallabaku po njihet çdo ditë e më shumë, por është thelbësore që promovimi i turizmit në Kukës të bëhet vazhdimisht, jo vetëm nga institucionet, por edhe nga qytetarët dhe shoqëria civile,” thekson Shehu.
Në kuadër të turizmit të qëndrueshëm, së fundmi Delegacioni i Bashkimit Evropian organizoi një aktivitet për të rinjtë pikërisht në këtë liqen, duke ofruar një eksperiencë të drejtpërdrejtë me natyrën.
Sara Zeka, një pjesëmarrëse në këtë nismë, u shpreh se ky vend i jashtëzakonshëm ishte një zbulim për të gjatë punës së saj në Kukës.
Megjithatë, rritja e vizitorëve sjell edhe sfida. Ndotja me mbetje plastike është një nga problemet që evidenton Andriti, duke theksuar nevojën për më shumë ndërgjegjësim dhe përgjegjësi: “Nëse nuk veprojmë tani, këto pasuri rrezikojnë të shkatërrohen nga pakujdesia jonë.”
Udhëtimi drejt liqenit të Kallabakut është një aventurë më vete. Pas një udhëtimi 90-minutësh nga Tirana në Kukës përmes Rrugës së Kombit, udhëtarët vazhdojnë drejt fshatit Novosej për rreth 45 minuta me makinë. Më pas, një ecje rreth 45 minuta përmes një shtegu malor të çon në liqen.
Liqeni i Kallabakut nuk është vetëm një peizazh i mrekullueshëm, por edhe një thesar natyror që kërkon mbrojtje dhe menaxhim të kujdesshëm. Kjo pasuri mund të kthehet në një simbol të krenarisë kombëtare, nëse mësojmë ta duam, ta promovojmë dhe ta ruajmë.
